Левоксимед

Қазақстан Республикасы 

Денсаулық сақтау министрлігі Фармация комитеті Төрағасының 

201_ жылғы “____” ___________

№ _____ бұйрығымен

БЕКІТІЛГЕН

Дәрілік затты медициналық қолдану

жөніндегі нұсқаулық

ЛЕВОКСИМЕД

Саудалық атауы

Левоксимед

Халықаралық патенттелмеген атауы

Левофлоксацин

Дәрілік түрі

Үлбірлі қабықпен қапталған 500 мг таблеткалар 

Құрамы

Бір таблетканың құрамында

белсенді зат – 500 мг левофлоксацин  (левофлоксацин жартылай гидраты түрінде 512,46 мг).  

қосымша заттар: микрокристалды целлюлоза (РН 101), кросповидон, гидроксипропилметилцеллюлоза 6 cps, микрокристалды целлюлоза (РН 200), магний стеараты, сусыз коллоидты кремнийдің қостотығы, титанның қостотығы (Е171), темірдің сары тотығы (Е172), темірдің қызыл тотығы (Е172).

Сипаттамасы

Ақшыл-шабдалы түсті үлбірлі қабықпен қапталған, бір жақ бетінде бөлетін сызығы бар ұзынша пішінді таблеткалар.  

Фармакотерапиялық тобы

Бактерияларға қарсы жүйелік қолдануға арналған препараттар. Микробтарға қарсы препараттар – хинолон туындылары. Фторхинолондар. Левофлоксацин.

ATX коды J01MA12

Фармакологиялық қасиеттері

Фармакокинетикасы

Ішке қабылдағаннан кейін левофлоксацин асқазан-ішек жолынан (АІЖ) тез және толық сіңеді. Пероральді түрде қабылдағанда левофлоксациннің абсолюттің биожетімділігі 99% құрайды. Қабылдағаннан кейін 1-2 сағаттан соң Cmax мәніне жетеді. Тамақпен бір мезгілде қабылдағанда Cmax жету уақыты аздап (1 сағатқа) артады және Cmax аздап (14%-ға) төмендейді, сондықтан левофлоксацинді тамақ ішуге қарамай тағайындай беруге болады. 

Левофлоксациннің 30 - 40%-ға жуығы қан плазмасы ақуызымен байланысады.

Левофлоксациннің орташа таралу көлемі бір реттік және қайталанған 500 мг дозаны енгізгеннен кейін шамамен 100 л құрайды, бұл организм тіндеріне ауқымды таралғанын көрсетеді.  

Левофлоксацин бронхтардың шырышты қабығына, эпителиальді төсеніш сұйықтығына, альвеолярлық макрофагтарға, өкпе тіндеріне, теріге (интерстициальді сұйықтық), простата тініне және несепке өтеді 

Левофлоксацин толық дерлік метаболизденеді, метаболиттері дезметил-левофлоксацин және левофлоксациннің N-тотығы болып табылады. Осы метаболиттерде препараттың <5% дозасы бар және несеппен бірге бөлініп шығады. Левофлоксацин стереохимиялық тұрғыдан тұрақты және хиральді инверсияға ұшырамайды.

Левофлоксацинді ішке қабылдағаннан кейін препарат плазмадан біршама баяу шығарылады (t/2: 6 - 8 сағ.). Негізінен бүйрек арқылы (енгізілген дозаның >85%-ы) шығарылады. Бір реттік 500 мг дозаны енгізгеннен кейін левофлоксациннің орташа болжамды жалпы клиренсі 175 +/- 29,2 мл/мин құрады.

Левофлоксациннің фармакокинетикасы 50-ден 1000 мг-ге дейінгі ауқымда дозаға байланысты болып табылады.

Пациенттердің ерекше топтары

Бүйрек функциясының жеткіліксіздігі бар пациенттер 

Левофлоксациннің фармакокинетикасына бүйрек функциясының жеткіліксіздігі ықпалын тигізеді. Бүйрек функциясы төмендеген кезде препараттың бүйрек арқылы шығарылуы және бүйректік клиренсі төмендейді, жартылай шығарылу кезеңі, төменде берілген кестеде көрсетілгендей, артады.  

Бір реттік 500 мг дозаны пероральді қабылдаудан кейін бүйрек функциясының жеткіліксіздігіндегі фармакокинетикасы.

Clкр [мл/мин]

<20

20 - 49

50 - 80

Clпоч. [мл/мин]

13

26

57

t1/2 [ч]

35

27

9

Егде жастағы пациенттер

Жас және егде жастағы пациенттерде, креатинин клиренсіндегі айырмашылықтарға байланыстысынан басқасында, левофлоксациннің фармакокинетикасында елеулі айырмашылықтар жоқ.

Фармакодинамикасы

Левофлоксацин (фтор-2, метил-10-(1-пиперазинил)-оксо-7Н-пиридол [1,2,3,-де-]-1,6-карбоксиловая кислота) – фторхинолондар тобына жататын бактерияларға қарсы синтетикалық дәрі. Бактерияларға қарсы әсер ету ауқымы кең. Тез бактерицидтік әсері II типті топоизомеразаларға жататын бактериялық ДНК-гиразаның левофлоксацинмен бәсеңдеуімен қамтамасыз етіледі. Нәтижесінде бактерияның ДНҚ-ның көлемдік құрылымы бұзылады және олардың бөлінуі бөгеледі. Левофлоксацин белсенділігінің ауқымына грамоң және грамтеріс бактериялар, соның ішінде нозокомиальді инфекцияны туындататын ферменттемейтін бактериялар, сондай-ақ С. pneumoniae, С. trachomatis, M. pneumoniae, L. pneumophila, Ureaplasma сияқты атипиялық микроорганизмдер жатады. Бұдан басқа, левофлоксацинге микобактериялар, Н. pylori және анаэробтар сияқты қоздырғыштар сезімтал. 

Препаратқа сезімтал: грамоң аэробтар – Enterococcus faecalis, Staphylococcus aureus метициллинге сезімтал, Staphylococcus haemolyticus метициллинге сезімтал, Staphylococcus saprophyticus, Streptococci С, G, Streptococcus agalactiae, Streptococcus pneumoniae, соның ішінде пенициллинге резистентті, Streptococcus pyogenes; грамтеріс аэробтар – Acinetobacter baumannii, Citrobacter freundii, Eikenella corrodens, Enterobacter agglomerans, Enterobacter cloacae, Escherichia coli, Haemophilus influenzae, соның ішінде ампициллинге резистентті, Haemophilus parainfluenzae, Klebsiella oxytoca, Klebsiella pneumoniae, Moraxella catarrhalis, соның ішінде α-лактамазаны өндіретін, Morganella morganii, Pasteurella multocida, Proteus mirabilis, Proteus vulgaris, Providencia rettgeri, Providencia stuartii, Pseudomonas aeruginosa, Serratia marcescens; анаэробтар – Bacteroides fragilis, Clostridium perfringens, Peptostreptococcus; тағы басқалар – Chlamydia pneumoniae, Chlamydia psittaci, Legionella pneumophila, Mycoplasma pneumoniae.

Препаратқа сезімталдығы тұрақты емес: грамоң аэробтар – Staphylococcus haemolyticus метициллинге резистентті; грамтеріс аэробтар – Burkholderia cepacia; анаэробтар – Bacteroides ovatus, Bacteroides thetaiotamicron, Bacteroides vulgaris, Clostridium difficile.

Препаратқа резистентті: грамоң аэробтар – Staphylococcus aureus, метициллинге резистентті. 

Басқа да фторхинолондар сияқты, левофлоксацин спирохетке қатысты белсенді емес.

Қолданылуы

Препаратқа сезімтал микроорганизмдерден туындаған инфекциялық-қабыну ауруларында:

- жедел синуситте

- төменгі тыныс алу жолдарының инфекцияларында: созылмалы бронхиттің асқынуында, ауруханадан тыс пневмонияларда  

- терінің және жұмсақ тін инфекцияларында

Жоғарыда аталған инфекциялар үшін левофлоксацинді, әдетте осы инфекциялардың бастапқы емі үшін ұсынылатын, бактерияларға қарсы дәрілік препараттарды пайдалану мақсатқа сай болмағанда ғана, пайдаланған жөн.   

- бүйрек және несеп шығару жолдарының асқынған инфекцияларында, пиелонефритті қоса

- асқынбаған циститте

- созылмалы бактериялық простатитте

- сібір ойық жарасының өкпелік түрінде: жанасудан кейінгі профилактика және радикальді ем жүргізуге 

Қолдану тәсілі және дозалары

Левоксимед таблеткасын тәулігіне 1-2 рет қабылдайды. Доза инфекцияның типіне және ауырлығына байланысты. Емдеу ұзақтығы ауру барысына байланысты және 14 күннен аспайды.Препаратты қолдануды дене температурасы қалыпқа келгеннен кейін 2-3 күн бойы жалғастыру ұсынылады. Препаратпен емдеуді өздігінен тоқтатуы немесе ұзақ мерзімге тоқтатуға рұқсат етілмейді. 

Левоксимед таблеткасын шайнамай, сұйықтықтың мол мөлшерімен ішіп, жұтқан жөн. Таблетканы тамақпен бірге де, сонымен қатар басқа да уақытта қабылдауға болады. 

Бүйрек функциясы қалыпты немесе орташа (креатинин клиренсі > 50 мл/мин) пациенттерді емдеу үшін препаратты дозалаудың келесі тәртібі ұсынылған:  

-жедел синусит: тәулігіне 1 рет 500 мг-ден, емдеу курсы 10-14 күнді құрайды;

-созылмалы бронхиттің өршуі: тәулігіне 1 рет 500 мг-ден, емдеу курсы - 7 күн;

-ауруханадан тыс пневмония: тәулігіне 1 рет 500 мг-ден, емдеу курсы - 7-14 күн;

-асқынбаған цистит: тәулігіне 1 рет 250 мг-ден, емдеу курсы - 3 күн; 

-несеп шығару жолдарының асқынған инфекциялары және жедел пиелонефрит: тәулігіне 1 рет 500 мг-ден, емдеу курсы – 7-14 күн;

-созылмалы бактериялық простатит: тәулігіне 1 рет 500 мг, емдеу курсы - 28 күн;

-тері мен жұмсақ тіндердің асқынбаған инфекциялары: тәулігіне 1-2 рет 500 мг-ден, емдеу курсы - 7-14 күн.

Бүйрек функциясы бұзылған пациенттер үшін дозалануы 

(креатинин клиренсі < 50 мл/мин)

 Креатининклиренсі

Дозалау режимі (инфекцияның ауырлығына байланысты)

50–20 мл/мин

алғашқы доза 250 мг

келесі: 

125 мг/24 сағат

алғашқы доза: 500 мг

келесі: 

250 мг/24 сағат

алғашқы доза: 500 мг

келесі: 

250 мг/12 сағат

19–10 мл/мин

алғашқы доза: 250 мг

келесі: 

125 мг/48 сағат

алғашқы доза: 500 мг

келесі: 

125 мг/24 сағат

алғашқы доза: 500 мг

келесі: 

125 мг/12 сағат

< 10 мл/мин, (сондай-ақгемодиализде және САПД1)

алғашқы доза: 250 мг

келесі: 

125 мг/48 сағат

алғашқы доза: 500 мг

келесі: 

125 мг/24 сағат

алғашқы доза: 500 мг

келесі: 

125 мг/24 сағат

1Гемодиализден немесе созылмалы амбулаторлық перитонеальді диализден (САПД) кейін қосымша дозалар керек емес.

Бауыр функциясы бұзылған пациенттер

Дозаны түзету қажет емес, өйткені левофлоксацин бауырда елеулі метаболизмге ұшырамайды және негізінен бүйрек арқылы шығарылады. 

Егде жастағы пациенттер

Егде жастағы пациенттерде дозаны түзету, бүйрек функциясының бұзылулары жағдайында қажет болуы мүмкін екендігінен басқасында, қажет емес («Айрықша нұсқаулар» «Тендинит және сіңірлердің үзілуі» және "QT аралығының ұзаруы"). 

Балалар

Левофлоксацинді 18 жасқа дейінгі балалар мен жасөспірімдерге қолдануға болмайды.

Левоксимед препараты таблеткаларын, левофлоксациннің сіңуінің азаюы мүмкін екендігіне байланысты, құрамында темір, мырыш, магний, алюминий тұздары бар препараттарды, антацидтерді немесе диданозинді (алюминий немесе магниймен біріккен диданозин ғана), сукральфаттарды қабылдаудан ең кемінде екі сағат бұрын немесе қабылдағаннан кейін екі сағаттан соң қабылдаған жөн.  

Жағымсыз әсерлері

Жағымсыз әсерлері кездесу жиілігі бойынша келесі топтарға шартты түрде жіктелуі мүмкін:   

Өте жиі (≥ 1/10), жиі (≥ 1/100; < 1/10), жиі емес (≥ 1/1,000;  ≤ 1/100), сирек (≥қ1/10,000;  ≤ 1/1,000), өте сирек (≤ 1/10,000), белгісіз (қолда бар деректер бойынша анықтау мүмкін емес).  

Жиі (≥1/100, <1/10)

- ұйқысыздық, бас ауыру, бас айналу

- жүректің айнуы, құсу, диарея

- бауыр ферменттерінің, мысалы, аланинаминотрансфераза (АЛТ) және аспартатаминотрансфераза (АСТ), сілтілік фосфатаза (СФ),  гамма-глутамилтранспептидаза (ГГТП) деңгейлерінің жоғарылауы

Жиі емес (≥1/1000, <1/100)

- Candida инфекциясын қоса, зеңдік инфекция

- патогеннің резистенттілігі

- лейкопения, эозинофилия

- анорексия

- мазасыздық

- сананың шатасу күйі, жоғары қозғыштық  

- ұйқышылдық, тремор, дисгевзия

- вертиго

- ентігу

- іштің ауыруы, диспепсия, метеоризм, іштің қатуы

- қанда билирубин деңгейінің жоғарылауы

- бөртпе, қышыну, есекжем, гипергидроз

- артралгия, миалгия

- қанда креатинин дейгейінің жоғарылауы

- астения

Сирек (≥1/10000, <1/1000)

- тромбоцитопения, нейтропения

- ангионевроздық ісіну, аса жоғары сезімталдық

- гипогликемия, әсіресе диетасы бар пациенттерде   

- психоздық реакциялар (мысалы, елестеулермен, паранойямен бірге) 

- депрессия, ажитация

- әдеттен тыс түс көрулер, қорқынышты түстер 

- конвульсиялар

- парестезия

- анық көрмеу сияқты көрудің бұзылуы 

- тиннитус

- тахикардия, жүректің қағуы

- гипотензия

- тендинитті қоса, сіңір аурулары (мысалы, ахилл сіңірі)

- гравис миастениямен ауыратын пациенттерде ерекше маңызға ие болуы мүмкін бұлшықет әлсіздігі

- бүйрек функциясының жеткіліксіздігі (мысалы, интерстициальді нефрит салдарынан)

- пирексия

Жиілігі белгісіз

- панцитопения, агранулоцитоз, гемолиздік анемия

- анафилаксиялық шок  (анафилаксиялық және анафилактоидтық реакциялар кейде препараттың алғашқы дозасын енгізгеннен кейін де пайда болуы мүмкін)   

- анафилактоидтық шок (тері-шырышты қабық реакциялары анда-санда тіпті препараттың алғашқы дозасын енгізгеннен кейін де пайда болуы мүмкін)

- гипергликемия

- гипогликемиялық кома 

- суицидтік ойлауды немесе суицидтік әрекетті қоса, пациенттің өзіне қауіп төндіретін мінез танытатын психоздық бұзылыстар

- шеткері сенсорлы нейропатия 

- шеткері сенсомоторлы нейропатия 

- аносмияны қоса паросмия   

- дискинезия, экстрапирамидалық бұзылыс

- агевзия

- естен тану

- қатерсіз бассүйекішілік гипертензия

-көруден уақытша айырылу

- естуден айырылу, естудің бұзылуы

- қарыншалық тахикардия, ол жүректің тоқтап қалуына әкелуі мүмкін.  

- қарыншалық аритмия және қарыншаларды жыпылықтауы-жыбырлауы (негізінен QT аралығының ұзару қаупі бар пациенттерде байқалады), ЭКГ-де QT аралығының ұзаруы

- бронхтың түйілуі, аллергиялық пневмонит

- диарея – геморрагиялық, өте сирек жағдайларда, жалған жарғақшалы колитті, панкреатитті қоса, энтероколиттің бар екендігін көрсетуі мүмкін

- сарғаю және бауырдың ауыр зақымдануы, негізінен негізгі ауруы ауыр пациенттерде өліммен аяқталатын бауыр функциясының жедел жеткіліксіздігі жағдайлары,  гепатит

- уытты эпидермальді некролиз, Стивенс-Джонсон синдромы, полиморфты эритема, фотосенсибилизация реакциясы, лейкоцитокластикалық васкулит, стоматит

- рабдомиолиз, сіңірлердің үзілуі (мысалы, ахилл сіңірі)

- байламдардың, бұлшықеттердің үзілуі 

- артрит

- ауыру (арқаның, көкіректің және аяқ-қолдың ауыруын қоса)  

Фторхинолондарды қолданумен байланысты басқа да жағымсыз әсерлерге мыналар жатады:

- порфириясы бар науқастарда порфирия ұстамалары.

Қолдануға болмайтын жағдайлар

- левофлоксацинге немесе басқа хинолондарға, сондай-ақ басқа да қосымша заттарға аса жоғары сезімталдық   

- эпилепсия

- фторхинолондарды қолданумен байланысты сіңірлердің ауруларының қазіргі таңда немесе анамнезде болуы

- жүктілік және лактация кезеңі

- 18 жасқа дейінгі балалар мен жасөспірімдер

Дәрілермен өзара әрекеттесуі

Левофлоксацинді келесі дәрілік заттармен: кальций карбонатымен, дигоксинмен, глибенкламидпен, ранитидинмен бірге қолданған кезде левофлоксациннің фармакокинетикасы клиникалық тұрғыдан маңызды дәрежеде өзгерген жоқ.   

Басқа дәрілік заттардың левофлоксацинге әсері:

Темір, мырыш тұздары, құрамында магний немесе алюминий бар антацидтік препараттар, диданозин

Левофлоксациннің сіңуі Левоксимедпен бір мезгілде темір, тырыш тұздарын, құрамында магний немесе алюминий антацидтік препараттарды, немесе диданозинді (құрамында алминий немесе магниймен бірге буферлі заттары бар диданозин түрлерін ғана) қолданғанда едәуір төмендейді.   

Фторхинолондарды және өзінің құрамында мырыш бар поливитаминді препараттарды бір мезгілде қолдану  пероральді түрде қабылдағанда олардың сіңуін төмедетеді. Препаратты қабылдаудан 2 сағат бұрын немесе қабылдағаннан кейін 2 сағаттан соң темір, мырыш тұздары, құрамында магний немесе алюминий бар антацидтік препараттар, немесе диданозин (құрамында алминий немесе магниймен бірге буферлі заттары бар диданозин түрлерін ғана) сияқты екі немесе үш валентті катиондары бар препараттарды қабылдауға кеңес берілмейді. Кальций тұздары пероральді түрде қабылдағанда өте аз әсер береді.  

Сукральфат

Левофлоксациннің биожетімділігі оны сукральфатпен бір мезгілде қолданғанда едәуір төмендейді. Егер пациентке сукральфатты, және Левоксимедті қабылдау қажет болса, препаратты қабылдағаннан кейін 2 сағаттан соң сукральфатты қабылдағаны өте-мөте дұрыс. 

Дәрілік препараттардың левофлоксацинмен өзара әрекеттесуі:

Теофиллин, фенбуфен және қабынуға қарсы стероидты емес дәрілер (ҚҚСД)

Клиникалық зерттеулер барысында левофлоксацин мен теофиллиннің фармакокинетикалық өзара әрекеттесулері байқалған жоқ. Алайда фторхинолондарды және теофиллинді, қабынуға қарсы стероидты емес препараттарды немесе құрысуға дайындық шегін төмендететін басқа да дәрілік заттарды бір мезгілде қабылдағанда эпилепсиялық дайындық шегінің едәуір төмендегені байқалуы мүмкін.  

Препаратты фенбуфенмен бір мезгілде қолданғанда левофлоксациннің концентрациясы шамамен 13%-ға жоғары болды.

Пробенецид және Циметидин

Левофлоксацинді, әсіресе бүйрек функциясы бұзылған пациенттерде, өзекшелік секрецияға ықпалын тигізетін пробенецид және циметидин сияқты препараттармен бірге сақтықпен қолданған жөн.  

Басқа да маңызды ақпарат

Клиникалық фармакология зерттеулері осы препаратты келесі дәрілік заттармен: кальций карбонатымен, дигоксинмен, глибенкламидпен, ранитидинмен бірге қолдану левофлоксациннің фармакокинетикасына клиникалық тұрғыдан маңызды ешқандай әсерін тигізбейтінін көрсетті.   

Левофлоксациннің басқа дәрілік заттарға әсері

Циклоспорин

Левофлоксацинмен бірге қолданғанда циклоспориннің жартылай шығарылу кезеңі 33%-ға арттады. 

К дәруменінің антагонистері

Левофлоксацин және К дәруменінің антагонисін (мысалы, варфаринді) біріктіріп қолданып емделген пациенттерде коагуляциялық сынама (ПУ/ХҚҚ) көрсеткіштерінің жоғарылау және/немесе қан кетулердің, ауыр болуы ықтимал, пайда болу жағдайлары жөнінде мәлімделді. Сондықтан К дәруменінің антагонисін қолданып емделіп жүрген пациенттерде коагуляциялық сынама нәтижелеріне мониторинг жүргізу қажет.  

QT аралығының ұзаруын туындататын дәрілік заттар

Левофлоксацинді, басқа да фторхинолондар сияқты,  QT аралығының ұзаруын туындататын препараттарды (мысалы, аритмияға қарсы IA және III класының препараттарын, трициклді антидепрессанттарды, макролидтерді, нейролептиктерді) қабылдап жүрген пациенттерде сақтықпен қолданған жөн.

Фармакокинетикалық өзара әрекеттесулерге жүргізілген зерттеулерде левофлоксацин теофиллиннің (CYP1A2 маркерлік субстраты) фармакокинетикасына ықпалын тигізген жоқ, ол левофлоксацин CYP1A2 тежегіші болып табылмайтындығын көрсетеді.

Айрықша нұсқаулар

Метициллин-резистентті алтын түсті стафилококктің, сондай-ақ левофлоксацинді қоса, фторхинолондарға төзімді болу ықтималдылығы жоғары. Демек, левофлоксацинді метициллин-резистентті стафилококк әсерінен туындаған инфекцияларды емдеуге, немесе егер зертханалық талдау нәтижелері микроорганизмнің левофлоксацинге сезімталдығын айғақтамаса (сондай-ақ, егер метициллин-резистентті стафилококк әсерінен туындаған инфекцияларды емдегенде тағайындалатын бактерияларға қарсы дәрілерді қолдану әдетте мақсатқа сай емес деп саналса) қолдану ұсынылмайды.  

Тендинит және сіңірлердің үзілуі

Сирек жағдайларда тендинит пайда болуы мүмкін. Көбіне ахилл сіңірі жиі зақымданады, тендинит сіңірлердің үзілуіне әкелуі мүмкін. Тендинит және сіңірлердің үзілуі, кейбір жағдайларда екі жақты, левофлоксацинмен емдеуді бастағаннан кейін 48 сағат ішінде пайда болуы мүмкін, сондай-ақ емдеуді аяқтағаннан кейін бірнеше ай ішінде осы патологияның пайда болу жағдайлары жөнінде мәлімделді. Тендиниттің және сіңірлердің үзілуінің даму қаупі 60 жастан асқан пациенттерде, 1000 мг тәуліктік дозаны қабылдап жүрген пациенттерде, сондай-ақ кортикостероидтарды қабылдағанда ұлғаяды. Егде жастағы пациенттерде тәуліктік дозаны креатинин клиренсіне байланысты түзеткен жөн. Демек, левофлоксацинді тағайындаған кезде мұндай пациенттерге мұқият мониторинг жүргізу қажет. Тендинит симптомдары пайда болған кезде барлық пациенттер емдеуші дәрігерге қаралғаны жөн. Тендинитке күдіктенген кезде левофлоксацин қолдануды дереу тоқтату керек және зақымданған сіңірді тиісінше емдеуді (мысалы, оны жеткілікті иммобилизациялаумен қамтамасыз ете отырып) бастау керек.

Clostridium difficile әсерінен туындаған ауру

Левофлоксацинмен емдеу кезінде немесе емдеуден кейін (емдеуді аяқтағаннан кейін бірнеше аптаны қоса) диарея, әсіресе ауыр, тынбайтын және/немесе қан аралас диарея Clostridium difficile әсерінен туындаған ауру симптомы болуы мүмкін. Clostridium difficile әсерінен туындаған аурулар ауырлығы жөнінен жеңілден өмірге қауіп төндіретін дәрежеге дейін өзгеруі мүмкін, мұндайда өте ауыр түрі жалған жарғақшалы колит болып табылады. Сондықтан пациентте, егер левофлоксацинді қолданып емдеу кезінде немесе емдеуден кейін ауыр диарея дамыса, осы диагнозды ескеру маңызды. Clostridium difficile әсерінен туындаған ауруға күдіктенгенде левофлоксацин қолдануды дереу тоқтатқан және тиісті емді кідіртпей бастаған жөн. Перистальтикаға қарсы препараттарды мұндай клиникалық жағдайларда қолдануға болмайды.  

Құрысулардың пайда болуына бейім пациенттер 

Хинолондар құрысуға дайындық шегін төмендетуі және құрысуларды өршітуі мүмкін. Левофлоксацинді анамнезінде эпилепсиясы бар пациенттерге қолдануға болмайды және, басқа да хинолондар сияқты, бұл препаратты құрысуларға бейімділігі бар пациенттерге қолданғанда, немесе белсенді заттары құрысуға дайындық шегін төмендететін дәрілік заттарды (мысалы, теофиллин) қолдана отырып ем жүргізгенде аса сақтық танытқан жөн. Конвульсивті құрысулар пайда болған жағдайда левофлоксацин қолданылатын емді тоқтату керек.

Глюкоза-6-фосфатдегидрогеназа жеткіліксіздігі бар пациенттер

Глюкоза-6-фосфатдегидрогеназа белсенділігінің жасырын немесе айқын бұзылулары бар пациенттерде бактерияларға қарсы хинолонды препараттармен ем жүргізген кезде гемолитикалық ракцияларға бейімділік байқалуы мүмкін. Сондықтан мұндай пациенттерге левофлоксацинді қолдану қажет болғанда оларда гемолизге қажеттіліктің туындауы тұрғысынан байқалған жөн. 

Бүйрек функциясы бұзылған пациенттер  

Левофлоксацин негізінен бүйрек арқылы экскрецияланатын болғандықтан, олардың функциясы бұзылған пациенттерде левофлоксациннің дозасын түзету керек.

Аса жоғары сезімталдық реакциялары

Левофлоксацин аса жоғары сезімталдықтың ауыр және потенциалды өлімге әкелетін реакцияларын (мысалы, ангионевроздық ісінуден анафилаксиялық шокқа дейін) туындатуы мүмкін, олар кейде препараттың алғашқы дозасын енгізгеннен кейін пайда болады. Пациенттер емдеуді дереу тоқтатқаны және тиісті шұғыл жәрдем көрсету үшін емдеуші дәрігермен немесе жедел жәрдемнің дәрігерімен байланыс жасағаны жөн.  

Ауыр буллездік реакциялар

Левофлоксацинді қолданған кезде Стивенс–Джонсон синдромы немесе уытты эпидермальді некролиз сияқты ауыр буллезді тері реакцияларының пайда болу жағдайлары жөнінде мәлімделді. Пациенттерге, емдеуді жалғастырар алдында, теріде/шырышты қабықтарда реакциялар пайда болған кезде емдеуші дәрігермен дереу байланыс жасауға кеңес берген жөн.   

Дисгликемия

Барлық хинолондарды қолданған кездегідей, гипо-, сонымен қатар гипергликемияны қоса, қандағы глюкоза мөлшерінде бұзылулардың туындағаны жөнінде мәлімделді, олар әдеттепероральді гипогликемиялық препараттармен (мысалы, глибенкламид) немесе инсулинмен қатар емделіп жүрген, диабеті бар пациенттерде байқалды. Гипогликемиялық кома жағдайлары жөнінде де мәлімделді. Диабеті бар пациенттерде қандағы глюкоза деңгейін мұқият бақылау ұсынылады.  

Фотосенсибилизацияның профилактикасы

Левофлоксацинді қолданған кезде фотосенсибилизацияның пайда болуы жөнінде мәлімделді. Фотосенсибилизацияның дамуына жол бермеу үшін пациенттерге емделу кезінде және оны тоқтатқаннан кейін 48 сағат ішінде күшті күн сәулесі немесе жасанды УК сәулелену (мысалы, УК шам, солярийлер) әсерінен аулақ болуға кеңес беріледі. 

К дәруменінің антагонистерін қолданып емделіп жүрген пациенттер 

Коагуляциялық сынамалардың (ПУ/ХҚҚ) көрсеткіштерінің ықтимал жоғарылауына және/немесе қан кетулердің туындауына байланысты левофлоксациннің және К дәрумені антагонисінің (мысалы, варфарин) біріктірілімін қолданып емделіп жүрген пациенттерде, осы препараттарды бір мезгілде қолданғанда коагуляциялық сынамалардың нәтижелеріне мониторинг жүргізу қажет.  

Психоздық реакциялар

Левофлоксацинді қоса, хинолондар қабылдаған пациенттерде психоздық реакциялардың пайда болу жағдайлары жөнінде мәлімделді. Өте сирек жағдайларда, тіпті левофлоксациннің дозасын бір реттік қолданудан кейін-ақ, осындай реакциялар пациенттің өзі үшін қауіп төндіретін суицидтік ойлар мен мінез-құлықтардың пайда болуына дейін өршіген. Осындай реакциялар пайда болған жағдайда левофлоксацин қабылдауды тоқтатқан және тиісті шараларды қолданған жөн. Левофлоксацинді психпен ауыратын науқастарда немесе анамнезінде психиатриялық аурулары бар болғанда сақтықпен тағайындау керек.   

QT аралығының ұзаруы

Левофлоксацинді қоса, фторхинолондарды QT аралығын ұзарту қаупінің мынадай бірнеше факторлары бар пациенттерде сақтықпен қолданған жөн:

- QT аралығы ұзаруының туа біткен синдромы

- QT аралығын ұзаруын туындататын дәрілік заттарды (мысалы, аритмияға қарсы ІА және ІІІ класының препараттары, трициклді антидепрессанттар, макролидтер, нейролептиктер) қатар қолдану

- электролиттер теңгерімінің түзетілмеген бұзылуы (мысалы, гипокалиемия, гипомагниемия)

- жүрек аурулары (мысалы, жүрек функциясының жеткіліксіздігі, миокард инфарктісі, брадикардия).

Егде жастағы науқастар және әйелдер QT аралығын ұзартатын препараттарға өте сезімтал болуы мүмкін. Демек, левофлоксацинді қоса, фторхинолондарды пациенттердің осы топтарына сақтықпен қолданған жөн.  

Шеткері нейропатия

Левофлоксацинді қоса, фторхинолондар қабылдап жүрген пациенттерде өте тез дами түсетін шеткері сенсорлы нейропатия және шеткері сенсомоторлы нейропатияның пайда болғаны жөнінде мәлімделді. Нейропатия симптомдары пайда болған кезде қайтымсыз бұзылулардың дамуына жол бермеу үшін левофлоксацинді қолдануды тоқтатқан жөн. 

Бауыр және өт шығару жолдары тарапынан бұзылулар 

Левофлоксацинді қолданғанда, негізінен, ауыр негізгі сырқаты, мысалы, сепсисі бар пациенттерде өліммен аяқталатын бауыр функциясының жеткіліксіздігіне дейін болатын бауыр некрозы жағдайлары жөнінде мәлімделді. Пациенттерге анорексия, сарғаю, несептің қараюы, қышыну және іштің ауырғыштығы сияқты бауыр ауруларының симптомдары мен белгілері пайда болған кезде емдеуді тоқтатуға және емдеуші дәрігермен байланыс жасауға кеңес берген жөн 

Гравис миастенияның өршуі

Левофлоксацинді қоса, фторхинолондардың нейробұлшықетті бөгейтін белсенділігі бар және гравис миастениядан зардап шегіп жүрген пациенттерде бұлшықет әлсіздігін күшейтуі мүмкін. Өлімді қоса, күрделі жағымсыз реакциялар және постмаркетингтік бақылау кезеңінде туындаған өкпені қосымша жасанды желдету қажеттілігі гравис миастениядан зардап шегіп жүрген пациенттерде фторхинолондарды қолданумен байланысты болды. Пациенттің анамнезінде гравис миастения бар болғанда левофлоксацинді қолдану ұсынылмайды.

Көрудің бұзылулары

Көрудің бұзылулары немесе препарат қабылдаудың көзге ықпал ету көріністері пайда болған кезде шұғыл түрде офтальмологқа қаралған жөн.

Суперинфекция

Левофлоксацинді, әсіресе ұзақ уақыт пайдалану сезімтал емес микроорганизмдердің шамадан тыс өсуіне әкелуі мүмкін. Емдеу кезеңінде суперинфекциялар пайда болған кезде тиісті шараларды қолданған жөн.  

Зертханалық зерттеулердің нәтижелеріне ықпалы  

Левофлоксациді қолданып емделіп жүрген пациенттерде несептегі апиындарға жүргізілген талдау жалғаноң нәтижелер беруі мүмкін. Көбірек спецификалық әдісті пайдалана отырып, апиындардың бар-жоқтығын талдау нәтижелерін айғақтау қажет болуы мүмкін.  

Левофлоксацин Mycobacterium tuberculosis өсуін басуы және, демек, туберкулездің бактериологиялық диагностикасының жалғантеріс нәтижелеріне себеп болуы мүмкін.

Жүктілік

Жүкті әйелдерге левофлоксацинді қолдану жөнінде деректер саны шектеулі. Клиникаға дейінгі зерттеулер ұрпақ өрбіту уыттылығы көзқарасы тұрғысынан тікелей немесе жанама зиянды әсерлерін байқаған жоқ. Алайда клиникалық деректердің жоқтығы, сондай-ақ эксперименттік деректердің өсіп келе жатқан организмде салмақ жүктемесін атқаратын шеміршектердің фторхинолондармен зақымдану қаупін айғақтауы нәтижесінде, жүкті әйелдерге левофлоксацинді қолданбаған жөн.  

Лактация кезеңі

Бала емізу кезеңінде әйелдерге левофлоксацинді қолдануға болмайды. Осы кезеңде левофлоксациннің емшек сүтімен бірге бөлініп шығуына қатысты ақпарат жеткіліксіз; алайда басқафторхинолондардың емшек сүтімен бірге бөлініп шығатыны белгілі. Клиникалық деректердің жоқтығы, сондай-ақ эксперименттік деректердің өсіп келе жатқан организмде салмақ жүктемесін атқаратын шеміршектердің фторхинолондармен зақымдану қаупін айғақтауы нәтижесінде, бала емізу кезеңінде әйелдерге левофлоксацинді қолданбаған жөн.   

Фертильділік

Левофлоксацин клиникаға дейінгі зерттеулерде фертильділіктің бұзылуын немесе ұрпақ өрбіту функциясының бұзылуын туындатқан жоқ.  

Көлік құралын немесе потенциалды қауіпті механизмдерді басқару қабілетіне дәрілік заттың ықпал ету ерекшеліктері  

Кейбір жағымсыз әсерлер, мысалы, бас айналу, ұйқышылдық, көрудің бұзылулары науқастың зейін қою қабілетін және оның реакция жылдамдығын төмендетуі мүмкін, ол мұндай қабілеттілік аса маңызды жағдайларда (мысалы, автомобильді және жұмыс механизмдерін басқарғанда) қауіпті болуы мүмкін.   

Артық дозалануы

Симптомдары: жүректің айнуы, асқазан-ішек жолының шырышты қабығының эрозиялық зақымдануы, бас айналу, сананың шатасуы, сананың бұзылулары және құрысу ұстамалары, елестеулер, тремор, QT аралығының ұзаруы.

Емі: Препарат қабылдауды тоқтату, симптоматикалық ем,  QT аралығының ұзарған-ұзармағанын анықтау үшін ЭКГ мониторинг жүргізу. Гемодиализ, перитонеальді диализ тиімді емес,Спецификалық антидоты жоқ.

Шығарылу түрі

Поливинилхлоридті үлбірден және алюминий фольгадан жасалған пішінді ұяшықты қаптамаға 7 таблеткадан салынған.  

Пішінді 1 қаптама медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынған.  

Сақтау шарттары

25°С-ден аспайтын температурада сақтау керек.

Балалардың қолы жетпейтін жерде сақтау керек!  

Сақтау мерзімі

3 жыл.

Жарамдылық мерзімі өткеннен кейін қолдануға болмайды. 

Дәріханалардан босатылу шарттары

Рецепт арқылы

Өндіруші

«УОРЛД МЕДИЦИН ИЛАЧ САН. ВЕ ТИДЖ. А.Ш.», ТҮРКИЯ

(Багджылар Илчеси, Гюнешли, Эврен Махаллеси, Джами Йолу Джад. №50 К. 1В Земин 4-5-6, Стамбұл)

“WORLD MEDICINE İLAÇ SAN. VE TIC. А.Ş.”, TURKEY

(Bağcılar İlçesi, Güneşli, Evren Mahallesi, Cami Yolu Cad. No:50 K. 1B Zemin 4-5-6, İstanbul).

Тіркеу куәлігінің иесі

«УОРЛД МЕДИЦИН ИЛАЧ САН. ВЕ ТИДЖ. А.Ш.», ТҮРКИЯ

Қазақстан Республикасы аумағында өнімнің сапасы жөніндегі шағымдарды қабылдайтын ұйымның мекенжайы 

ҚР, Алматы, Түрксіб ауданы, Сүйінбай д-лы, 222б

Тел/факс: 8 (7272) 529090

Тіркеуден кейін дәрілік заттың қауіпсіздігіне жауапты ұйымның мекенжайы  

«TROKA-S PHARMA» ЖШС, Алматы, Сүйінбай д-лы, 222б

Ұялы тел +7 701 786 33 98, (24 сағат бойы қолжетімді).

e-mail:pvpharma@worldmedicine.kz