Ибуфен ультра

Қазақстан Республикасы 

Денсаулық сақтау министрлігі Медициналық және 

фармацевтикалық қызметті 

бақылау комитеті Төрағасының 

20   жылғы “____” ___________

№ _____ бұйрығымен

БЕКІТІЛГЕН

Дәрілік заттың медицинада қолданылуы

жөніндегі нұсқаулық

ИБУФЕН® УЛЬТРА

Саудалық атауы

Ибуфен® Ультра 

Халықаралық патенттелмеген атауы  

Ибупрофен 

Дәрілік түрі

200 мг капсулалар

Құрамы 

Бір капсуланың ішінде

белсенді заттар - 200 мг ибупрофен, 

қосымша заттар: макрогол 600, калий гидроксиді, тазартылған су,

қабығы: кристалданбайтын сұйық сорбитол, сұйық мальтитол, желатин.

Сипаттамасы 

Ашық сары, құрамында тұтқыр сұйықтық бар желатинді капсулалар

Фармакотерапиялық тобы 

Қабынуға қарсы және ревматизмге қарсы препараттар. Қабынуға қарсы стероидты емес препараттар. Пропионқышқылының туындылары. Ибуфропен

ATХ коды  М01АЕ01    

Фармакологиялық қасиеттері 

Фармакокинетикасы

Ибупрофенді ішу арқылы қолданғаннан кейін 80%-дан астамы ас қорыту жолынан сіңеді. Препараттың 90%-ы қан плазмасы ақуыздарымен байланысады (негізінен альбуминдермен).

Аш қарынға қабылдағанда қан плазмасындағы ең жоғарғы концентрациясына жету кезеңі – 45 минут, тамақтан кейін қабылдағанда – 1,5-2,5 сағат; синовиальді сұйықтықта – 2-3 сағат, мұнда қан плазмасындағыға қарағанда, жоғары концентрациялары құралады. 

Препарат организмде жинақталмайды.

Ибупрофен негізінен бауырда метаболизденеді. Жүйеалды және жүйеден кейінгі метаболизмге ұшырайды. Сіңірілгенде 60%-ға жуық фармакологиялық белсенді емес R түріндегі ибупрофен белсенді S түріне баяу өзгереді.

Препараттың 60-90%-ы метаболиттер және олардың глюкурон қышқылымен қосылған өнімдері түрінде бүйрекпен, азғантай дәрежеде өтпен шығарылады және өзгеріссіз күйде 1% артық емесі бөлініп шығады. Бір реттік дозасын қабылдағаннан кейін препарат 24 сағат ішінде толығымен  шығарылады.

Фармакодинамикасы

Ибуфен® Ультра пропион қышқылының туындысы болып табылады. Ауыруды басатын, ыстықты түсіретін және қабынуға қарсы әсер етеді. 

Ибуфен® Ультраның әсер ету механизмі ең алдымен,  арахидон қышқылының простагландиндерге, простациклин мен тромбоксанға айналуын реттейтін циклооксигеназа (ЦОГ) – ферментінің белсенділігін төмендетуі есебінен простагландиндер биосинтезін бәсеңдетуіне негізделеді. Сонымен бірге арахидон қышқылы метаболизмінің циклооксигеназалық жолының қайтымсыз тежелуі нәтижесінде простагландиндердің түзілуі азаяды. Қабынған жердегі простагландиндер  концентрациясының төмендеуі брадикининнің, эндогенді пирогендердің,  биологиялық белсенді заттардың, оттегі радикалдары мен NO түзілуінің азаюымен қатар жүреді. Мұның барлығы  қабыну үдерісі белсенділігінің төмендеуіне алып келеді (ибупрофеннің қабынуға қарсы әсері) және ауыру рецепциясының азаюымен қатар жүреді (ауыруды басатын әсері). Ми-жұлын сұйықтығындағы простагландиндер концентрациясының азаюы дене температурасының қалыпқа келуіне алып келеді (пиретикаға қарсы әсері). 

Ибуфен® Ультра жұмсақ желатинді капсулаларының ішінде сұйық түрдегі ибупрофен бар. Желатинді капсула оған салынған заттарды дозалаудың жоғары дәлдігін қамтамасыз етеді. Капсула қабығы әсер етуші затты жарықтың, ауа мен ылғалдың әсерінен қорғауды қамтамасыз  етеді, сондай-ақ қабылдаған кезде дәрілік заттың жағымсыз дәмі мен иісін болдырмайды. Капсула АІЖ-да драже мен таблеткаларға қарағанда тез ыдырайды, ал оның ішіндегі сұйықтық ибупрофеннің биожетімділігін қамтамасыз ете отырып, адам ағзасында тезірек және жеңіл сіңіріледі.

Қолданылуы 

Әртүрлі этиологиядағы және жеңілден орташаға дейінгі қарқындылықтағы  ауырулар:

-      бас ауыруы (сондай-ақ бас сақинасы)

-        тіс ауыру

-        бұлшықет, буын және сүйектер  ауыруы   

-        жарақаттан кейінгі ауыру

-        невралгия

-        суық тигенде және тұмаудағы ауыру

-        ауырып келетін етеккір 

-        ортаңғы отиттегі болатын құлақ ауыру.

Шығу тегі әртүрлі қызбалы жай-күйде (сондай-ақ тұмаудағы, суық тигенде немесе басқа да инфекциялардағы).

Қолдану тәсілі және дозалары 

Препаратты қабылдауға арналған нұсқаулықты мұқият оқыңыз.

Ішке қабылдауға арналған. Тек қысқа мерзімді қолдануға арналған.

Ересектер және 12 жастан үлкен балалар (40 кг астам): ішке 1 капсуладан (200 мг), шайнамай, тәулігіне 3-4 ретке дейін. Капсуланы сумен ішу керек. Препарат қабылдау арасындағы аралық 6-8 сағатты құрауы тиіс. 

Ересектерде бір реттік дозаның жылдамырақ емдік әсеріне жету үшін   тәулігіне 3 ретке дейінгі 2 капсулаға дейін (400 мг) ұлғайтылуы мүмкін.

Ең жоғары тәуліктік дозасы 1200 мг құрайды.

12-17 жастағы балаларға арналған ең жоғары тәуліктік дозасы 1000 мг құрайды.

Егер препаратты 2-3 күн бойына қабылдағанда симптомдары сақталса немесе  күшейсе, емді тоқтату және дәрігерге қаралу керек.   

Жағымсыз әсерлері

Жағымсыз реакцияларының туындау жиілігін бағалау келесі критерийлер негізінде жүргізілген: өте жиі (≥ 1/10), жиі (≥ 1/100 - < 1/10 дейін), жиі емес (≥ 1/1000 -< 1/100 дейін), сирек (≥ 1/10 000 - < 1/1000 дейін), өте сирек (> 1/10 000).

Жиі емес: 

- тері бөртпесі және қышынуы бар аллергиялық реакциялар

- іштің ауыруы, жүрек айнуы, диспепсия, іштің кебуі

- бас ауыруы 

Сирек:

- диарея, метеоризм, іш қатуы және құсу 

- бас ауыруы, бас айналуы, ұйқысыздық, қозу, ашушаңдық, шаршауды сезіну 

Өте сирек:

- қан түзудің бұзылуы (анемия, лейкопения, апластикалық анемия, гемолитикалық анемия, тромбоцитопения, панцитопения, агранулоцитоз) 

- ісінулер пайда болуы, артериялық гипертензия, ҚҚСП тобының препараттарын қолдануға байланысты жүрек жеткіліксіздігі

- аса жоғары сезімталдықтың ауыр реакциялары, оның ішінде беттің, тілдің және көмейдің  ісінуі, ентігу, тахикардия, артериялық гипотензия (анафилаксия, Квинке ісінуі немесе ауыр  анафилаксиялық шок)

- пептидтік ойық жара, тесілулер немесе асқазан-ішек қан кетулері, мелена, кейбір жағдайларда өліммен аяқталатын қанды құсық (әсіресе егде жастағы пациенттерде), ойық жаралы стоматит, ойық жара колит өршуі және Крон ауруы  

- бауыр функциясы бұзылуы (әсіресе ұзақ емдегенде), гепатит және сарғаю, нефроздық синдром, жедел бүйрек жеткіліксіздігі (компенсацияланатын және декомпенсацияланатын), интерстициальді нефрит, цистит

- асептикалық менингит симптомдары: желке бұлшықеттерінің сіресуі, бас ауыруы, жүрек айнуы, құсу, қызба немесе бағдарлау бұзылуы, әсіресе алдында аутоиммундық бұзылулары болған пациенттерде (жүйелік қызыл жегі, дәнекер тіндердің аралас аурулары)

- ісінулер, оның ішінде шеткері ісінулер

 - гематокрит немесе гемоглобин азаюы

- көрудің бұзылуы, құлақтағы шуыл, бас айналуы 

- психоздық реакциялар, депрессия

Клиникалық сынақтар нәтижелері ибупрофен қабылдаудың, әсіресе жоғары дозаларда (тәулігіне ≥ 2400 мг)қабылданатын, және  артериялық тромбоздық құбылыстар (мысалы, миокард инфарктісі және инсульт) дамуының аздаған жоғары қаупінің арасында өзара  әрекеттесулері мүмкіндігі болуын болжайды.

Жағымсыз әсерлері пайда болғанда препарат қолдануды тоқтату керек.

Қолдануға болмайтын жағдайлар  

-      ибупрофенге немесе препараттың басқа компоненттеріне, сондай-ақ басқа да қабынуға қарсы стероидты емес дәрілік препараттарға  жоғары сезімталдық

-      ацетилсалицил қышқылын немесе басқа қабынуға қарсы стероидты емес препараттарға  қолданудан кейінгі қандай да бір уақытта аллергияның ерте симптомдарының тұмау, тері бөртпелері немесе бронх түйілуінің реакцияларының білінулері  

-      асқазан-ішек жолының ойық жаралы зақымдануы (асқазанның және он екі елі ішектің ойық жара ауруы, ойық жаралы колит)

-      асқазан-ішектен қан кету

-      анамнезінде ҚҚСД емдеумен байланысты асқазан-ішектен қан кетудің немесе тесілуінің болуы 

-      ауыр жүрек жеткіліксіздігі (NYHA IV)

-      гемофилия және басқа да қан ұюының бұзылулары (оның ішінде гипокоагуляция), геморрагиялықдиатездер

- бүйректің немесе бауырдың ауыр жеткіліксіздігі  

- жүктіліктің III триместрі  

- 12 жасқа дейінгі балалық жас

Дәрілермен өзара әрекеттесуі

Ибуфен® Ультра препаратын   (қабынуға қарсы стероидты емес препараттары тобының басқа да дәрілік заттары сияқты)  төменде аталған дәрілік заттармен бір мезгілде қолдануға болмайды:

-      ацетилсалицил қышқылымен, басқа да ҚҚСД-мен және кортикостероидтармен: АІЖ тарапынан жағымсыз әсерлерінің даму қаупі артады 

Ацетилсалицил қышқылы 

Жағымсыз құбылыстар дамуы мүмкіндігі жоғарылауына байланысты ибупрофенді және ацетилсалицил қышқылын бір мезгілде қолдану ұсынылмайды. 

Зертханалық зерттеулер нәтижесі бойынша ибупрофенді ацетилсалицил қышқылының төмен дозаларымен бір мезгілде қолданудың тромбоциттер агрегациясын бәсекелес тежеуі мүмкіндігі болжанады. Бұл деректердің клиникалық практикадағы экстраполяцияға қол жетімділігі белгісіз болып қалса да, ибупрофенді ұзақ уақыт жүйелі қабылдаудың ацетилсалицил қышқылының төмен дозаларының кардиопротекторлық әсері төмендеуіне болжамды әсерін  жоққа шығаруға болмайды. Ибупрофенді эпизодттық қолданудың ацетилсалицил қышқылының кардиопротекторлық қасиетіне әсерінің ықтималдығы аз болады. 

Келесі препараттармен бір мезгілде қолданғанда сақ болу қажет:

-      гипертензияға қарсы препараттармен  және диуретиктермен: ҚҚСД-мен бір  мезгілде қолданған кездегідей олардың тиімділігі төмендейді 

-      антитромбоздық препараттарымен: ҚҚСД қан ұюын төмендететін препараттардың әсерін күшейтеді

-      литиймен, метотрексатпен, дигоксинмен және фенитоинмен:  ҚҚСД бұл препараттардың плазмадағы концентрациясын арттыруы мүмкін (олардың сарысудағы концентрациясын мезгіл-мезгіл бақылау ұсынылады)  

-      зидовудинмен:  ибупрофенмен бір мезгілде қолданғанда қан кету уақытының артуы мүмкін 

-      антиагреганттық дәрілік препараттармен және серотонинді кері қармайтын селективті тежегіштерімен (СКҚСТ): асқазан-ішектен қан кету қаупі дамуының жоғарылауы мүмкін 

-      мифепристонмен: мифепристонды қабылдағаннан кейін ҚҚСД 8-12 күн бойы қолдануға болмайды, себебі ҚҚСД оның әсерін әлсіретуі мүмкін

-      такролимуспен, циклоспоринмен:  ибупрофенді бұл дәрілік препараттармен бір мезгілде қолданғанда нефроуытты әсерінің қаупі артады 

-      хинолонды антибиотиктермен: ҚҚСД және хинолондарды біріктіріп қабылдаған пациенттер құрысулардың пайда болу қаупіне ұшырауы мүмкін

-      калий жинақтаушы диуретиктермен: ибупрофенмен бір мезгілде қолдану гиперкалиемияның дамуына әкелуі мүмкін

-      пробеницидпен, сульфинпиразонмен: бұл препараттар ибупрофеннің шығарылуын тежеуі мүмкін

Айрықша нұсқаулар  

Бүйрек жеткіліксіздігі, қан айналымы жүйесінің жеткіліксіздігі немесе бауыр функциясының бұзылуы бар адамдарға сақ болған жөн. 

Бронх демікпесі немесе ацетилсалицил қышқылына аллергиялық реакциялары, сондай-ақ басқа дәрілік заттарды (гипертензияға қарсы, диуретиктік, кардиотропты және психотропты дәрілік заттар) қабылдайтын адамдарға препаратты  аса сақ болған жағдайда қолдануға болады. 

Ибупрофенді қолданғанда уытты амблиопияның бірлі-жарымды жағдайлары байқалған.

Ас қорыту жүйесі тарапынан бұзылулар пайда болу мүмкіндігін ескере отырып, ибупрофенді  ульцерогенді әсері бар заттармен немесе дәрілік препараттармен (оның ішінде ацетилсалицил қышқылымен, кортикостероидтармен) бір мезгілде қабылдамаған жөн. 

Асқазан-ішек қан кетулері, ойық жара түзілуі және тесілуі. 

Кейбір жағдайларда өліммен аяқталатын асқазан-ішек жолдарынан қан кету, ойық жаралануы немесе тесілуі емнің әр кезеңінде алдыңғы симптомдарымен немесе онсыз немесе асқазан-ішек жолдарынан  қан кету эпизодтарымен немесе онсыз (спецификалық емес ойық жаралы колит, Крон ауруын қоса) ҚҚСП қолданудан кейін анықталды.

Асқазан-ішек жолдарынан қан кету, ойық жаралануы немесе тесілуінің қаупі анамнезінде ойық жара ауруы бар пациенттерде, әсіресе қан кету немесе тесілумен асқынған, сондай-ақ егде жастағы адамдарда  ҚҚСП дозасы жоғарылауымен қоса артады.

Асқазан-ішек жолдарынан қан кету немесе ойық жаралануы басталған жағдайда  дәрілік препаратты қабылдауды дереу тоқтату керек.

Анамнезінде асқазан-ішек жолдарының аурулары бар пациенттерге, әсіресе егде жастағы адамдарға  асқазан-ішек жолдары тарапынан  болатын барлық типтік емес симптомдар туралы (әсіресе қан кетулер), әсіресе емнің басында дәрігерге хабарлау керектігі туралы ескерту керек. Бұл пациенттер дәрілік препараттың ең аз тиімді дозасын қабылдауы тиіс.

Бір мезгілде дәрілік препараттарды қабылдайтын пациенттер асқазан-ішек бұзылуы немесе қан кетуі қаупін ұлғайтуы мүмкін кортикостероидтар, варфарин, серотонинді кері қармаудың селективті тежегіштері сияқты қан ұюына қарсы препараттарды немесе антиагреганттар (ацетилсалицил қышқылы сияқты) сияқты басқа дадәрілік препараттарды қабылдай отырып, сақ болуы керек

Жүрек-қан тамырлар жүйесі және ми қан айналымы тарапынан бұзылулар

Анамнезінде гипертониясы және/немесе  ауырлығы жеңіл және орташа дәрежедегі жүрек жеткіліксіздігі бар  пациенттер бақылауларды және кеңес алуды қажет етеді, өйткені ҚҚСП емдегенде сұйықтық іркілуі, артериялық қысым артуы және ісінулер анықталуы мүмкін.

Клиникалық зерттеулердің және эпидемиологиялық деректер нәтижесіне сәйкес ибупрофенді, әсіресе жоғары дозаларда (күнделікті 2400 мг) және ұзақ уақыт бойына қолданғанда артериялық тромбоз қаупі (мысалы, миокард инфарктісі немесе инсульт) жоғарылауымен қатар жүруі мүмкін. Негізінен эпидемиологиялық зерттеулер ибупрофеннің төмен дозалары (мысалы, тәулігіне 1200 мг аз) миокард инфарктісі даму қаупі артуына алып келмейтінін көрсетті.

Тері реакциялары

ҚҚСП қолдануға байланысты айқын тері реакцияларының өте сирек жағдайлары (кейде өліммен аяқталған), мысалы,  эксфолиативті дерматит, Стивенс-Джонсон синдромы және уытты эпидермальді некролиз (Лайелл синдромы) өте сирек сипатталған.

Шамасына қарай, тері реакциясының көбірек даму қаупіне пациенттер емнің бастапқы кезеңінде бейім болады,  өйткені көп жағдайларда көрсетілген реакциялар емнің бірінші айында дамиды. Тері бөртпесінің бірінші белгілерінде, ауыз қуысының шырышты қабығының зақымдануында немесе басқа да аса жоғары сезімталдықтың симптомдарында  препарат қабылдауды тоқтату керек.

Ерекше жағдайларда, желшешек тері және жұмсақ тіндер тарапынан күрделі инфекциялық асқынулардың себебі болуы мүмкін. Қазіргі кезде  бұндай инфекцияларды емдегенде ҚҚСП рөлін жоққа шығаруға болмайды. Сондықтан шешекте ибупрофен қолданудан аулақ болу ұсынылады.

Сонымен бірге әртүрлі анальгетикалық дәрілік препараттарды ұзақ уақыт қолдану бүйрек жеткіліксіздігі даму қаупі бар (анальгетикалық нефропатия) бүйрек зақымдануына әкелуі мүмкін. ҚҚСП инфекцияның және қызбаның симптомдарын бүркемелеуі мүмкін.

Ибупрофенді қолданғанда уытты амблиопияның жеке-дара жағдайлары анықталды, сондықтан көрудің барлық бұзылулары туралы дәрігерді хабардар ету керек.

Сусыздануы бар балалар мен жасөспірімдерде бүйрек жеткіліксіздігі қаупі бар.

Бұл препараттың құрамында сұйық мальтитол бар. Тұқым қуалайтын фруктоза көтере алмаушылығы (сирек генетикалық ауруы) бар пациенттерде  бұл препаратты қолдануға болмайды.

Жүктілік және лактация кезеңі

Ибупрофенді жүктілік кезінде әйелдерде қолдану қауіпсіздігіне қатысты егжей-тегжейлі ақпарат жоқ.  Простагландиндер синтезі бәсеңдеуінің адам ұрығына әсері белгісіз болғандықтан, ибупрофенді жүктіліктің бірінші және екінші триместрінде қолдану ұсынылмайды. Ибупрофенді  жүктіліктің III триместрінде қолдануға болмайды, себебі  бұл артериялық түтіктің мерзімінен бұрын жабылуына ықпал етеді және жаңа туған балада өкпелік гипертензияны туындатуы мүмкін, сондай-ақ жатырдың жиырылу белсенділігін бәсеңдетеді, бұл  босанудың басталуын тежейді және босану әрекетін ұзартады, сондай-ақ ана мен балада қан кету қаупін арттырады.  

Лактация

Ибупрофен және оның метаболиттері өте төмен концентрацияларда емшек сүтіне түседі. Емшектегі балалар үшін жағымсыз салдары туралы  хабарламалар әлі күнге дейін түспегендіктен, препаратты қысқа мерзімде қолданғанда бала емізуді тоқтату қажеттілігі туындамайды.  

Фертильділігі

Овуляцияға әсер етуі және сонысымен әйелдің ұрпақ өрбіту қабілетіне теріс әсер етуі мүмкін циклооксигеназа/простагландиндер синтезін тежейтін дәрілік препараттарды қолдану туралы хабарлар бар. Бұндай әсерлер препаратты қолдануды тоқтатқан соң жойылады. 

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері  

Ибуфен® препаратын қабылдау кезінде бас айналуы пайда болатындықтан, мұны көлік құралын басқарғанда және қозғалыстағы механизмдерге  қызмет көрсеткенде ескеру керек.  

Артық дозалануы

Балаларда артық дозалану симптомдары дене салмағына қарай 400 мг/кг асатын доза қабылдағаннан кейін дамуы мүмкін. ересектердегі артық дозаланудың дозаға тәуелді әсерінің айқындығы аз. Артық дозаланғанда препараттың жартылай шығарылу кезеңі 1,5-3 сағатты құрайды.

Симптомдары: жүрек айнуы, құсу, эпигастриялық аумақтағы ауыру немесе, сирек, диарея, құлақтағы шуыл, бас ауыруы және асқазан-ішек қан кетулері. Ауырырақ жағдайларда орталық жүйке жүйесі тарапынан білінулер бақыланды: ұйқышылдық, сирек – қозу, құрысулар, бағдар жоғалту, кома. Ауыр улану жағдайында метаболизмдік ацидоз және  протромбиндік уақыт артуы, бүйрек жеткіліксіздігі, бауыр тіндерінің  зақымдануы, артериялық қысым төмендеуі, тыныс алу бәсеңдеуі және цианоз дамуы мүмкін. Бронх демікпесі бар пациенттерде бұл аурудың өршуі мүмкін.

Емі: ибупрофеннің уыттылығы потенциалды дозасын қабылдағаннан кейін 1 сағат ішінде асқазанды шаю, белсендірілген көмір қабылдау. Қажет болғанда – тыныс алу жолдарының өткізгіштігін міндетті түрде қамтамасыз ете отырып,  пациент жай-күйі қалыпқа келгенге дейін ЭКГ және  негізгі өмір көрсеткіштерін мониторингілеумен симптоматикалық ем. Егер ибупрофен осыған дейін сіңіп қойса, ибупрофеннің қышқыл туындыларын бүйрекпен шығару мақсатында сілтілі сусын, қарқынды диурез тағайындалуы мүмкін. Жиі немесе ұзақ уақыттық құрысуларды диазепамды немесе  лоразепамды вена ішіне енгізумен басу керек. Бронхдемікпесі нашарлағанда бронходилататорлар қолдану ұсынылады.

Шығарылу түрі мен қаптамасы

10 капсуладан поливинилхлоридті/поливинилдихлоридті үлбірден  (ПВДХ/ПВХ) және алюминий фольгадан жасалған пішінді ұяшықты қаптамаға салады.

1 немесе 2 пішінді қаптамадан мемлекеттік және орыс тілдеріндегі  медициналық қолдануы жөніндегінұсқаулықпен бірге картон қорапшаға салады.

Сақтау шарттары

Түпнұсқалық қаптамада, 25 0С-ден аспайтын температурада сақтау керек. 

Балалардың қолы жетпейтін жерде сақтау керек.

Сақтау мерзімі 

2 жыл.

Препаратты жарамдылық мерзімі өткеннен кейін  қолдануға болмайды.

Дәріханалардан босатылу шарттары

Рецептісіз

Өндіруші                               

«Медана Фарма» АҚ

98-200 Серадз, В. Локетка к-сі 10, Польша

Тіркеу куәлігінің иесі

«Химфарм» АҚ, Қазақстан

Қазақстан Республикасы аумағында тұтынушылардан өнім сапасына қатысты шағымдарды қабылдайтын ұйымның мекенжайы

«Химфарм» АҚ, Шымкент қ., Қазақстан Республикасы, Рашидов к-сі, 81

Телефон нөмірі  7252 (610151)

Электронды поштасы   complaints@santo.kz

Қазақстан Республикасы аумағында дәрілік заттың тіркеуден кейінгі қауіпсіздігін қадағалауға жауапты ұйымның  мекенжайы  

«Химфарм» АҚ, Шымкент қ., Қазақстан Республикасы, Рашидов к-сі, 81

Телефон нөмірі  +7 7252 (610150)