Кетонал

Қазақстан Республикасы 

Денсаулық сақтау министрлігі медициналық және 

фармацевтикалық қызметті 

бақылау комитеті Төрағасының 

2014 жылғы “____” __________

№ _____ бұйрығымен

БЕКІТІЛГЕН

Дәрілік заттың медицинада

қолданылуы жөніндегі

нұсқаулық

Кетонал®

Саудалық атауы

Кетонал®

Халықаралық патенттелмеген атауы 

Кетопрофен

Дәрілік түрі

50 мг капсулалар

Құрамы

1капсуланың құрамында

белсенді зат -           50 мг кетопрофен бар,

қосымша заттар: лактоза  моногидраты, магний  стеараты, сусыз кремнийдің коллоидты қостотығы,

капсула қабығының құрамы: желатин, титанның қостотығы (Е171), патенттелген көк V (Е131).  

Сипаттамасы

Қатты желатинді мөлдір емес капсулалар, капсуланың тұрқы ақ түсті, қақпағы-көгілдір түсті, ішіндегісі – сарғыш-ақ түсті тығын түріндегі ұнтақ немесе масса

Фармакотерапиялық тобы

Қабынуға қарсы стероидты емес дәрілер. Пропион  қышқылының туындылары. Кетопрофен.

АТХ коды  М01АЕ03

Фармакологиялық қасиеттері

Фармакокинетикасы 

Кетопрофен асқазан-ішек жолынан тез сіңеді. 50 мг кетопрофенді ішке қабылдаған соң биожетімділігі 90% құрайды және дозаның ұлғаюына қарай біртіндеп ұлғаяды. Тамақ ішу кетопрофеннің (AUC) жалпы биожетімділігіне әсер етпейді, бірақ сіңу жылдамдығын азайтады. Кетопрофен қан плазмасы ақуыздарымен 99% байланысады, көбіне альбуминді фракциялармен.

Таралу көлемі 0,1-0,2 л/кг құрайды. Кетопрофенді ішке қабылдағаннан кейін плазмалық концентрациясы ең жоғары мәніне 1сағ 22 минуттан кейін жетеді. 

Синовиальді сұйықтықта кетопрофен концентрациясы плазмалық концентрацияның (1,5 мкг/мл) 50% жетеді; кетопрофен синовиальді сұйықтықтан баяу-24 сағат бойы шығарылады.

Бауырда  глюкуронды қышқылмен конъюгацияланып метаболизденеді. Кетопрофеннің  75%-ға жуығы  несеппен, көбіне  глюкурон қышқылының конъюгаты түрінде бөлінеді. 10%-дан аздау шамасы өзгермеген түрде нәжіспен шығарылады.

Кетопрофен тіндерде жинақталмайды. Кетопрофеннің жартылай шығарылу кезеңі 2 сағатқа жетеді.

Бүйрек жеткіліксіздігі бар емделушілерде  кетопрофен баяулау шығарылады, ал оның жартылай шығарылу кезеңі 1 сағатқа ұзарады. Оларда да кетопрофен клиренсі төмендеген. Ауыр бүйрек жеткіліксіздігінде дозаны төмендету талап етіледі. Бауыр жеткіліксіздігі бар емделушілерде қан плазмасындағы кетопрофен концентрациясы шамамен 2 есе ұлғаяды, бұл өте төмен тәуліктік доза тағайындауды талап етеді. 

Фармакодинамикасы

Кетонал®  капсулаларының қабынуға қарсы, ауырғанды басатын және ыстық түсіретін әсері бар.

Әсер ету механизмі арахидон қышқылынан простагландиндер синтезін катализдейтін, циклооксигеназа (циклооксигеназа-1 және циклооксигеназа-2) ферменттерінің белсенділігін басу есебінен, простагландиндер мен лейкотриендердің  биосинтезін тежеуімен байланысты. Кетопрофен лизосома жарғақшаларын тұрақтандырады және антибрадикининді белсенділікке ие.

Қолданылуы

Ревматизм аурулары:

- ревматоидты артрит

- серонегативті спондилоартриттар (шорбуынданатын спондило-артрит, реактивті артрит)

- подагра, жалған подагра

- остеоартроз

- буыннан тыс ревматизм (тендинит, бурсит, иық буыны капсулиті) 

Ауыру синдромы:

- жарақаттан кейінгі

-операциядан кейінгі

- альгодисменорея

- онкологиялық аурулары бар емделушілердегі сүйек метастазындағы ауырулар

Қолдану тәсілі және дозасы

Кетонал® капсулаларын шайнамай, жеткілікті мөлшердегі су немесе сүтпен (100 мл-ден кем болмау керек) тамақпен бірге немесе тамақтан соң бірден қабылдайды.  

50 мг капсулалар: ересектерге  1 капсуладан таңертең, түске, кешке тағайындайды. 

Ревматоидты артритті емдеуде ұсынылатын доза – әрбір 6 сағат сайын 1 капсуладан.  Ең жоғары тәуліктік доза 200мг құрайды. 

Қажетсіз жағымсыз әсерлерді болдырмас үшін  емделуші Кетоналмен®  бір мезгілде  антацидті дәрілер қабылдауына болады. 

Емнің ұзақтығын дәрігер анықтайды.

Креатинин клиренсі минутына   20мл-ден төмен болатын ауыр емес бүйрек жеткіліксіздігі бар және созылмалы бауыр аурулары бар (қан сарысуында альбумин деңгейі төмен) емделушілерде кетопрофен дозасын азайтқан дұрыс.

Жағымсыз әсерлері

Әртүрлі жағымсыз әсерлер туындау жиілігін бағалауда  келесі градациялар пайдаланылды: "өте жиі" – ³ 10%, "жиі" – ³ 1% шамасынан  < 10% -ға дейін, "жиі емес" – ³ 0,1% шамасынан < 1% дейін, "сирек" –³ 0,01% шамасынан < 0,1% дейін, "өте сирек" – < 0,01%.

Жиі: 

- диспепсиялық көріністер, тәбет төмендеуі, жүрек айнуы, құсу, метеоризм, абдоминальді ауырулар, іш қатуы 

Жиі емес:

- диарея, гастрит

-бас ауыруы, бас айналуы, ұйқышылдық

- тері бөртпесі

Сирек:

- геморрагиялық анемия, лейкопения

- депрессия, ұйқысыздық, ашушаңдық, парестезия

- көрудің нашарлауы

- құлақтағы шуыл

- стоматит, асқазан мен он екі елі ішектің ойық жарасы 

- гепатит, трансаминазалар және билирубин деңгейінің жоғарылауы

- дене салмағының артуы

- анафилактикалық шок

- бронхтүйілуі, бронхиальді демікпе ұстамалары

Өте сирек:

- колит пен Крон ауруының асқынуы, асқазан-ішектен қан кету

-  бауыр қызметінің бұзылуы 

- жедел бүйрек жеткіліксіздігі, тубулоинтерстициальді нефрит

- гипернатриемия, гиперкалиемия

- агранулоцитоз, тромбоцитопения 

- құрыспалар

- жүрек жеткіліксіздігі

- артериялық гипертензия

- ринит

- фотосенсибилизация, Квинке ісінуі, Стивенс-Джонсон синдромын қоса алғандағы буллезді бөртпе,  уытты эпидермальді некролиз

Қолдануға болмайтын жағдайлар

- кетопрофен, аспиринге  немесе басқа қабынуға қарсы стероидты емес  

  дәрілерге (сыртартқыда ацетилсалицил қышқылын қабылдаумен  

  байланысты демікпе, бронхтүйілу, есекжем немесе ринит көрсетілсе) 

  жоғары сезімталдықта 

- ауыр жүрек жеткіліксіздігі 

- асқазан-ішек жолының асқыну кезеңіндегі аурулары (гастрит, асқазанның ойық жарасы ауруы, сыртартқыда асқазан-ішек жолынан қан кету, жара пайда болуы немесе жараның тесілуі көрсетілсе)

- қан кету (асқазан-ішектік,  цереброваскулярлы немесе басқа да белсенді қан кетулер)

-қан кетуге бейім болу

- бауыр мен бүйрек қызметінің айқын бұзылуы

- қан тарапының бұзылуы (лейкопения, тромбоцитопения, гемокоагуляцияның бұзылуы)

- бронх  демікпесі, ринит

- жүктілік және лактация кезеңі

- 18-ге дейінгі балаларға және жасөспірімдерге 

Дәрілік заттармен әрекеттесуі

Кетоналды басқа қабынуға қарсы  стероидты емес дәрілермен және салицилаттармен үйлестіре қабылдауға болмайды.

Кортикостероидтармен үйлестіріп қабылдаған жағдайда  ойық жара пайда болу  және асқазан-ішек қан кету қатері жоғарылайды.

Антикоагулянттар (гепарин және варфарин) және тромбоциттер агрегациясын тежегіштер (яғни тиклопидин, клопидогрель) қан кету туындау қатерін жоғарылатады.  Егер бірге қабылдамауға болмайтын болса, емделушіні мұқият бақылау керек.

Кетонал гипотензивті және несеп айдайтын дәрілердің тиімділігін төмендетеді. Несеп айдайтын, гипотензивті дәрілерді немесе АПФ тежегіштерін қабынуға қарсы  стероидты емес препараттармен бір мезгілде қабылдайтын емделушілерде бүйрек жеткіліксіздігі даму қатері жоғары.

Калий препараттарын, калий жинақтаушы диуретиктерді, АПФ тежегіштерін, гепариндерді (молекулярлық массасы төмен немесе фракцияға бөлінбеген), циклоспоринді, такролимусты және триметопримді қабынуға қарсы  стероидты емес препараттармен бір мезгілде қабылдау гиперкалиемия туындауына ықпал етуі мүмкін.

Кетонал пероральді қабылданатын қант төмендететін және кейбір құрысуға қарсы (фенитоин) дәрілердің әсерін күшейтеді.

Кетонал, басқа да қабынуға қарсы  стероидты емес препараттар сияқты шығарылуды азайтады, сонысымен жүрек гликозидтерінің, литий, циклоспорин мен метотрексаттың уыттылығын жоғарылатады.

Қабынуға қарсы  стероидты емес дәрілер мифепристон әсерін төмендетуі мүмкін. Қабынуға қарсы  стероидты емес дәрілерді мифепристон қабылдауды тоқтатқаннан соң 8-12 күннен кейін ғана бастау керек.

Циклоспоринді  Кетоналмен бір мезгілде қолданудан бүйректің уытты зақымдану қатері жоғарылайды.

Айрықша нұсқаулар

Кетоналды басқа қабынуға қарсы стероидты емес препараттармен,  оның ішінде  ЦОГ-2 іріктеп тежегіштерді қоса бір мезгілде қабылдауға болмайды.

Препаратты сыртартқыларында асқазан-ішек жолының аурулары (қан кету мен перфорация алдын - ала симптомсыз кенеттен басталуы мүмкін) көрсетілген емделушілерге ерекше сақтықпен тағайындалу керек.  

Ойық жара немесе қан кету қатерін жоғарылататын ішу арқылы қабылданатын кортикостероидтар, антикоагулянттар (мысалы варфарин),  серотонинді кері қармайтын селективті тежегіштер немесе  антиагрегантты дәрілер (оның ішінде ацетилсалицил қышқылы) сияқты дәрілерді алатын емделушілерде сақтық жасау керек. Қабынуға қарсы стероидты емес препараттар дозасы жоғарылауымен асқазан-ішек қан кетулері, ойық жараның пайда болуы немесе тесілу қатері  жоғарылайды. Мұндай жағдайларда асқазан-ішек жолдарына протективті әсер ететін препараттармен біріктірілген емді (мысалы, мизопростол немесе протон помпасы тежегіштері) қарастырған жөн.

Асқазан-ішек жолдары аурулары бар емделушілер (әсіресе егде жастағылар) кез келген абдоминальді білінулерді емдеуші дәрігерге хабарлауы тиіс.

Асқазан-ішек қан кетулері немесе асқазан-ішек жолдарының ойық жарасы туындаған жағдайда емді шұғыл тоқтату керек.

Кетопрофенмен ем кезінде ағзада сұйықтық іркілуі дамуы немесе күшеюі туралы хабарламалар болуына байланысты, артериялық гипертензия және/немесе іркілген жүрек жеткіліксіздігі бар емделушілерді мұқият қадағалау керек. 

Кетопрофенмен ем кезінде әсіресе жүрек-қан тамырлары ауруы бар емделушілерде артериялық қысым мониторингі ұсынылады. 

Бақыланбайтын артериялық гипертензиясы, жедел және ауыр созылмалы  жүрек жеткіліксіздігі,  жүректің ишемиялық ауруы бар, шеткергі артерия және/немесе цереброваскулярлы  аурулармен ауыратын емделушілерге кетопрофенмен ем абайлап жүргізілуі тиіс. Кейбір қабынуға қарсы стероидты емес препараттар артериялық тромбоздар (миокард инфарктісі, инсульт) қатері дамуына байланысты қолданылуы мүмкін. Кетопрофен үшін бұл қатерді жоққа шығаратын деректер жеткіліксіз.

Демікпесі, созылмалы ринит, созылмалы синусит және/немесе мұрын полипозы бар емделушілерде басқа емделушілерге қарағанда аллергиялық реакциялар жиі кездеседі.

Сондай-ақ гемостаз бұзылуларымен,  гемофилиямен, Виллебранд – Юргенс ауруымен, ауыр  тромбоцитопениямен, бүйрек немесе бауыр жеткіліксіздігімен ауыратын,  антикоагулянттар (кумарин және гепарин туындыларын, бәрінен бұрын молекулярлық салмағы төмен гепариндер) қабылдайтын емделушілерде де сақтық жасалуы керек.

Емнің басында жүрек жеткіліксіздігі, цирроз және нефрозы бар емделушілерде, несеп айдайтын ем қабылдайтын емделушілерде, созылмалы бүйрек жеткіліксіздігі бар, әсіресе егде жастағы емделушілерде бүйрек қызметіне мұқият мониторинг жасалуы керек. Мұндай емделушілерде кетопрофенді қабылдау  простагландиннің тежелуі нәтижесінде бүйрек қан ағысының төмендеуін туындатып, бүйректің қалпына келмеуіне алып келуі мүмкін.

Егер емдеу кезінде көру қабілетінің бұзылулары байқалса емді тоқтату керек.

Радикальді хирургиялық араласулар алдында  кетопрофенмен емді тоқтату керек.

Кетопрофен қабылдау әйелдің фертильділігін төмендетуі мүмкін, жүкті болғысы келетін әйелдерге қабылдау ұсынылмайды.

Берілген дәрілік препарат құрамында этанол 12.3 % (к/і) бар. Әрбір 2 мл дозасы құрамында 0,2 г этанол бар.  

Препаратты егде жастағыларға сақтықпен тағайындаған дұрыс. 

Қабынуға қарсы стероидты емес препараттармен, оның ішінде кетопрофенмен емнің ұзақ курсын алу  гематологиялық көрсеткіштерді, бауыр мен бүйрек қызметі көрсеткіштерін мониторингтеуді, әсіресе егде жастағыларда, талап етеді. 

Дәрілік заттың көлікті және потенциалды қауіпті механизмдерді басқару қабілетіне әсер ету ерекшелері 

Бас айналу, кеңістікте бағдар жоғалту, ұйқышылдық, фокусы бұзылған көру немесе құрысулар туындаған жағдайда көлік жүргізуге және потенциалды қауіпті механизмдерді басқаруға болмайды.

Артық дозалануы

Симптомдары: жүректің айнуы, құсу, іштің ауыруы, қан құсу, нәжістің қараюы, сананың бұзылуы, тыныс алудың нашарлауы, құрысу, бүйрек қызметінің бұзылуы және бүйрек жеткіліксіздігі. 

Емдеу: симптоматикалық, арнайы у қайтарғысы жоқ. Асқазанды  шаю және белсенділендірілген  көмірді қолдану ұсынылады. Кетопрофеннің асқазан-ішек жолына әсерін Н2-бөгегіштер, протон  помпасының тежегіштері және простагландиндердің көмегімен әлсіретуге болады.

Шығарылу түрі  

Бірінші ашылуына бақылауы бар, пластик қақпақпен тығындалған янтарь шынысы құтысында 25 капсуладан. Құтыларға өздігінен жапсырылатын заттаңба жапсырылған. 1 құтыдан мемлекеттік және орыс тілдеріндегі медицинада қолданылуы жөніндегі нұсқаулықпен бірге картон пәшкеге салынады.

Сақтау шарттары

25 ºС-ден аспайтын температурада сақтау керек. 

Балалардың қолы жетпейтін жерде сақтау керек!

Сақтау мерзімі

5 жыл

Препаратты  қаптамасында көрсетілген жарамдылық мерзімі өткеннен кейін  қолдануға болмайды.

Дәріханалардан босатылу шарты

Рецепт арқылы

Өндіруші/Қаптаушы

Лек Фармасьютикалс д.д., Словения

Веровшкова 57,  Любляна

Тіркеу куәлігінің иесі

Лек Фармасьютикалс д.д., Словения

Веровшкова 57,  Любляна

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы 

«Сандоз Фармасьютикалс д.д.» АҚ Қазақстан Республикасындағы өкілдігі