Катаксол

Дәрілік затты медициналық қолдану

жөніндегі нұсқаулық

КАТАКСОЛ

Саудалық атауы

Катаксол

Халықаралық патенттелмеген атауы

Жоқ

Дәрілік түрі

Көзге тамызатын дәрі, 0.015%

Құрамы

1 мл препараттың құрамында:

белсенді зат – 0.15 мг натрий азапентацен полисульфонаты,

қосымша заттар: бор қышқылы, натрий тетраборат декагидраты, калий хлориді, тиомерсал, метилпарагидроксибензоат, пропилпара-гидроксибензоат, натрий гидроксиді, тазартылған су

Сипаттамасы

Қою-қызыл түсті мөлдір ерітінді.

Фармакотерапиялық тобы

Сезім мүшелері. Офтальмологиялық препараттар. Басқа офтальмологиялық  препараттар.

АТХ коды S01XA 

Фармакологиялық қасиеттері

Фармакокинетикасы

Фармакокинетикасына зерттеулер жүргізілмеген.

Фармакодинамикасы

Катаксол – катаракта кезінде қолданылатын офтальмологиялық препарат. Азапентацен көз бұршағының сульфгидрильді топтарын тотығудан қорғайды және көз бұршағының мөлдір емес ақуыздарының таралуына ықпал етеді. Көздің алдыңғы камерасының сулы ылғалындағы протеолитикалық ферменттеріне белсенді әрекет етеді. Препарат үдеп келе жатқан катарактаға қарсы профилактикалық дәрі ретінде ғана емес, мөлдір емес протеиндерді ерітетін зат ретінде де қолданылуы мүмкін. 

Қолданылуы

- қарттық катарактада

- туа біткен катарактада

- жарақаттық катарактада

- екіншілік катарактада

Қолдану тәсілі және дозалау тәртібі

Тек жергілікті қолдануға ғана арналған.

Катаксол препаратын тәулігіне 3-5 рет 2 тамшыдан зақымданған көздің конъюнктива қабына тамызады.

Қолданғаннан кейін қабақты жабу және мұрын-жас өзегін басу ұсынылады, ол дәрілік препараттың жүйелік сіңірілуін төмендетеді, нәтижесінде оның жағымсыз әсерлері төмендейді. 

Препарат ұзақ емдеуге арналған. Жылдам жақсару жағадйында да емдеуді тоқтатпау ұсынылады. 

Жағымсыз әсерлері

Жергілікті                       

Өте сирек:

- көздің тітіркенуі

Жиілігі белгісіз:

-  көздің ауыруы

-  көздің құрғауы, көзден жас ағудың күшеюі

Қолдануға болмайтын жағдайлар 

- препарат компоненттеріне жоғары сезімталдық

Дәрілермен өзара әрекеттесуі

Катаксол препаратының басқа дәрілік заттармен дәрілік өзара әрекеттесуі анықталмаған.

Айрықша нұсқаулар

Препараттың құрамында аллергиялық реакция туындатуы мүмкін қосымша зат ретінде тиомерсал бар.

Жанаспалы линзалар

Катаксолды жанаспалы линзалар таққанда пайдалану ұсынылмайды.

Препаратты қолданар алдында жанаспалы линзаны көзден алу керек және тамызғаннан кейін 15 минут өтпей оларды қайта көзге киюге болмайды.  Тамшылатқыш тығынның ұшын көзге немесе кез келген беткейге тигізуге болмайды. 

Педиатрияда қолдану

Катаксол препаратын балаларда қолдану зерттелмеген. 

Жүктілік және лактация кезеңі

Катаксол көзге тамызатын дәрісін жүкті әйелдерге тек дәрігердің тағайындауымен және қатаң бақылауымен ғана қолдануға болады.

Емдеу уақытында бала емізуді тоқтату керек.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Препаратты қолданғаннан кейін уақытша көру айқындылығы жоғалатын пациенттердің жоғары зейін қою мен психомоторлық реакциялар айқындығын қажет ететін қауіптілігі зор қызмет түрлерінен аулақ болғандары жөн. 

Артық дозалануы 

Көзге тамызатын дәрі түріндегі препараттың артық дозалануы туралы деректер жоқ.

Шығарылу түрі және қаптамасы

15 мл препараттан тамшылатқыш-тығыны және сақтандырғыш сақинамен жабдықталған бұралатын қорғағыш қақпақшасы бар пластик құтыға құяды.

1 тамшылатқыш құтыдан мемлекеттік және орыс тіліндегі медициналық қолдану жөніндегі нұсқаулықпен бірге картон қорапшаға салынады.

Сақтау шарттары

Жарықтан қорғалған жерде, 25ºС-ден аспайтын температурада сақтау керек.

Балалардың қолы жетпейтін жерде сақтау керек! 

Сақтау мерзімі

3 жыл.

Құтыны ашқаннан кейін препаратты 28 күн ішінде пайдалану керек.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы