Кетонал

Қазақстан Республикасы 

Денсаулық сақтау министрлігі Медициналық және 

фармацевтикалық қызметті 

бақылау комитеті Төрағасының 

20  _ жылғы “____” ___________

№ _____ бұйрығымен

БЕКІТІЛГЕН

Дәрілік заттың медицинада қолданылуы

жөніндегі нұсқаулық

Кетонал®

Саудалық атауы

Кетонал®                     

Халықаралық патенттелмеген атауы 

Кетопрофен

Дәрілік түрі

Инъекцияға арналған 100 мг/2 мл, 2мл ерітінді

Құрамы

2 мл ерітіндінің құрамында

белсенді зат – 100 мг кетопрофен,

қосымша заттар: пропиленгликоль, этанол 96%, бензил спирті (Е 1519), натрий гидроксиді, инъекцияға арналған су.

Сипаттамасы

Іс жүзінде көзге көрінетін бөлшектері жоқ, түссізден сәл сарғыштау түске дейінгі мөлдір ерітінді.

Фармакотерапиялық тобы

Қабынуға қарсы стероидты емес дәрілер. Пропион  қышқылының туындылары. Кетопрофен.

АТХ коды  М01АЕ03

Фармакологиялық қасиеттері

Фармакокинетикасы 

Көктамыр ішіне инфузия жасағаннан кейін плазмалық концентрациясы ең жоғары мәніне (26,4+5,4 мкг/мл) 4-5 минуттан кейін жетеді, бұлшықет ішіне инъекция жасалғанда 15 минуттан кейін  жетеді және 2 сағат бойы сақталады. 

Биожетімділігі 90% құрайды және препарат дозасының ұлғаюына қарай біртіндеп ұлғаяды. Кетопрофен қан плазмасы ақуыздарымен 99% байланысады, көбіне альбуминді фракцияларымен. Таралу көлемі 0,1-0,2 л/кг құрайды. 

Синовиальді сұйықтықта кетопрофен концентрациясы плазмалық концентрациядан (1,5 мкг/мл) 50% жетеді; синовиальді сұйықтықтан баяу - 24 сағат ішінде шығарылады.

Бауырда  глюкурон қышқылымен конъюгацияланып, метаболизденеді. Кетопрофеннің  80%-ға жуығы  несеппен, көбіне  глюкурон қышқылының конъюгаты түрінде бөлінеді. 10%-дан аздау шамасы өзгермеген түрде нәжіспен шығарылады. Кетопрофеннің жартылай шығарылу кезеңі 2 сағатқа жетеді. Бүйрек жеткіліксіздігі бар емделушілерде  кетопрофен баяулау шығарылады, ал оның жартылай шығарылу кезеңі 1 сағатқа ұзарады. 

Фармакодинамикасы

Кетонал®  инъекцияға арналған ерітіндісінің орталық жүйке жүйесінде простагландин синтезін тежеу есебінен  қабынуға қарсы, ауырғанды басатын және ыстық түсіретін әсері бар.

Әсер ету механизмі арахидон қышқылынан простагландиндер синтезін катализдейтін, циклооксигеназа (циклооксигеназа-1 және циклооксигеназа-2) ферменттерінің белсенділігін басу есебінен, простагландиндер мен лейкотриендердің биосинтезін тежеуімен байланысты. Кетопрофен лизосомалық жарғақшаларды тұрақтандырады,  лейкотриен синтезін тежегіш әсері бар және антибрадикининді белсенділікке ие.

Қолданылуы

Ауыру синдромында:

- жарақаттан кейінгі

- операциядан кейінгі

         - онкологиялық аурулары бар емделушілердегі сүйектердің   

           метастаздары кезіндегі ауыру.

Ревматизм ауруларында:

- ревматоидты артрит

           - серонегативті спондилоартриттар (шорбуынданатын спондило-артрит, реактивті артрит)

- подагра, жалған подагра

- остеоартроз

           - буыннан тыс ревматизм (тендинит, бурсит, иық буыны капсулиті) 

Қолдану тәсілі және дозалары

Ұсынылатын дозасы – бұлшықет ішіне күніне 1-2 рет 100 мг-ден (1 ампулa). 

Қажет болған жағдайда ем Кетоналдың пероральді, ректальді және сыртқа қолдануға арналған түрлерін пайдалана отырып, толықтырылуы мүмкін.

Көктамырішілік инфузия тек стационар жағдайында ғана тағайындалады.

100-200 мг кетопрофен натрий хлоридінің 0,9% 100 мл ерітіндісінде сұйылтылады. Кемінде 30-60 минут бойы енгізіледі. 

Ең жоғары тәуліктік дозасы 200мг кетопрофеннен (дәрілік түрлердің барлығын қоса алғанда) аспауы тиіс.

Емдеу ұзақтығын дәрігер анықтайды, кетоналдың инъекциялық түрімен емдеуді 3 күннен артыққа созу ұсынылмайды.

 Креатинин клиренсі минутына 20мл-ден төмен болатын бүйрек жеткіліксіздігі бар және созылмалы бауыр аурулары бар (қан сарысуында альбумин деңгейі төмен) емделушілерде кетопрофен дозасын азайтқан дұрыс. 

Егде емделушілерде емді кетопрофеннің төмен дозасынан бастап және демеуші емді препараттың ең төмен тиімді дозасымен жүргізу керек.

Ескерту

Шөгінді пайда болатындықтан, трамадол мен кетопрофенді бір құтыда араластыруға болмайды. Кетопрофен жарыққа сезімтал болғандықтан, инфузияға арналған құтылар қара қағазға немесе алюминий фольгаға оралуы тиіс, 

Жағымсыз әсерлері

Әртүрлі жағымсыз реакциялардың туындау жиілігін бағалауда  келесі градациялар пайдаланылды: "өте жиі" – ³ 10%, "жиі" – ³ 1%-дан < 10% -ға дейін, "жиі емес" – ³ 0,1%-дан < 1% дейін, "сирек" –³ 0,01%-дан < 0,1% дейін, "өте сирек" – < 0,01%.

Жиі: 

- диспепсиялық құбылыстар, тәбеттің төмендеуі, жүрек айнуы, құсу, метеоризм, абдоминальді ауырулар, іш қатуы 

Жиі емес:

- диарея, гастрит

- бас ауыруы, бас айналуы, ұйқышылдық

- тері бөртпесі

- иньекция орнының ісінуі, ауыруы және ашыту сезімдері

Сирек:

- геморрагиялық анемия, лейкопения

- депрессия, ұйқысыздық, күйгелектік, парестезия

- көрудің нашарлауы

- құлақтағы шыңыл  

- стоматит, асқазан мен он екі елі ішектің ойық жарасы 

- гепатит, трансаминазалар мен билирубин деңгейінің жоғарылауы

- дене салмағының артуы

- анафилактикалық шок

- бронх түйілуі, бронх демікпесінің ұстамалары

Өте сирек:

- колит пен Крон ауруының асқынуы, асқазан-ішектен қан кетулер

-  бауыр функциясының бұзылуы 

- бүйректің жедел жеткіліксіздігі, тубулоинтерстициальді нефрит

- гипернатриемия, гиперкалиемия

- агранулоцитоз, тромбоцитопения 

- құрысулар

- жүрек жеткіліксіздігі

- артериялық гипертензия

- ринит

- фотосенсибилизация, Квинке ісінуі, Стивенс-Джонсон синдромын қоса алғандағы буллезді бөртпе,  уытты эпидермальді некролиз

Қолдануға болмайтын жағдайлар

- кетопрофенге, аспиринге  немесе препараттың қосымша заттарының кез-келгеніне жекелей жоғары сезімталдық  

Сондай-ақ препарат төмендегі жағдайларда қарсы көрсетілімді:

- сыртартқысында кетопрофенді немесе басқа қабынуға қарсы стероидты емес препараттар (ҚҚСП) немесе салицилаттар (ацетилсалицил қышқылы) сияқты әсері ұқсас  заттарды қолданғаннан кейін бронх демікпесі, есекжем, ринит, бронх түйілуі немесе аллергиялық реакциялар болса,  

- жүректің ауыр жеткіліксіздігі 

- аортокоронарлық шунттау (АКШ) операциясын жүргізу кезеңіндегі ауыруды емдеу

- белсенді фазадағы пептикалық ойық жара, сондай-ақ  сыртартқыдағы асқазан-ішектен қан кету, ойық жара немесе тесілу 

- асқазан-ішектен, церебро-васкулярлық немесе басқа белсенді қан кетулер 

- сыртартқыдағы созылмалы дипепсия 

- бүйрек функциясының айқын бұзылулары

- бауыр функциясының айқын бұзылулары 

- қан кетуге бейімділік

- қан ұйығыштығының бұзылуы немесе антикоагулянттармен ағымдағы ем

- қан жүйесі тарапынан болатын бұзылулар (лейкопения, тромбоцитопения, гемокоагуляция бұзылулары)

- жүктілік және лактация кезеңі

- 15 жасқа дейінгі балаларға 

Дәрілік заттармен әрекеттесуі

Назар аударыңыз! Преципитация болмауы үшін Кетоналдың® инъекцияға арналған ерітіндісі мен  трамадолды бір құтыда араластыруға болмайды.

Кетоналды басқа қабынуға қарсы  стероидты емес дәрілермен және салицилаттармен үйлестіріп қабылдауға болмайды.

Кортикостероидтармен үйлестіріп қабылдаған жағдайда  ойық жара пайда болу  және асқазан-ішек қан кету қатері жоғарылайды.

Антикоагулянттар (гепарин және варфарин) және тромбоциттер агрегациясын тежегіштер (яғни тиклопидин, клопидогрель) қан кету туындау қатерін жоғарылатады. Егер бірге қабылдау қажет болса, емделушіні мұқият бақылау керек.

Кетонал гипотензивті және несеп айдайтын дәрілердің тиімділігін төмендетеді. Несеп айдайтын, гипотензивті дәрілерді немесе АПФ тежегіштерін қабынуға қарсы  стероидты емес препараттармен бір мезгілде қабылдайтын емделушілерде бүйрек жеткіліксіздігі даму қатері жоғары.

Калий препараттарын, калий жинақтағыш диуретиктерді, АПФ тежегіштерін, гепариндерді (молекулалық салмағы төмен немесе фракцияға бөлінбеген), циклоспоринді, такролимусты және триметопримді қабынуға қарсы  стероидты емес препараттармен бір мезгілде қабылдау гиперкалиемия туындауына ықпал етуі мүмкін.

Кетонал пероральді қабылданатын қант төмендететін және кейбір құрысуға қарсы (фенитоин) дәрілердің әсерін күшейтеді.

Кетонал, басқа да қабынуға қарсы  стероидты емес препараттар сияқты шығарылуды азайтады, сонысымен жүрек гликозидтерінің, литий, циклоспорин мен метотрексаттың уыттылығын жоғарылатады.

Қабынуға қарсы  стероидты емес дәрілер мифепристон әсерін төмендетуі мүмкін. Қабынуға қарсы  стероидты емес дәрілерді мифепристон қабылдауды тоқтатқаннан 8-12 күннен кейін ғана бастау керек.

Циклоспоринді  кетоналмен бір мезгілде қолданудан бүйректің уыттылықтан зақымдану қатері жоғарылайды.

Айрықша нұсқаулар

Кетоналдың® инъекцияға арналған ерітіндісін басқа қабынуға қарсы стероидты емес препараттармен,  оның ішінде  ЦОГ-2 селективті тежегіштерімен қоса бір мезгілде қабылдауға болмайды.

Препаратты сыртартқыларында асқазан-ішек жолының аурулары (қан кету мен перфорация алдын - ала белгілерсіз кенеттен басталуы мүмкін) көрсетілген емделушілерге ерекше сақтықпен тағайындалу керек.  

Ойық жара немесе қан кету қаупін жоғарылататын пероральді қабылданатын кортикостероидтар, антикоагулянттар (мысалы варфарин),  серотонинді кері қармаудың селективті тежегіштері немесе  антиагреганттық дәрілер (оның ішінде ацетилсалицил қышқылы) сияқтыларды қабылдайтын емделушілерде сақтық шараларын сақтау керек. Қабынуға қарсы стероидты емес препараттар дозасы жоғарылауымен асқазан-ішек қан кетулері, ойық жараның пайда болуы немесе тесілу қатері  жоғарылайды. Мұндай жағдайларда асқазан-ішек жолдарына протективті әсер ететін препараттармен біріктірілген емді (мысалы, мизопростол немесе протон помпасы тежегіштері) қарастырған жөн.

Асқазан-ішек жолдары аурулары бар емделушілер (әсіресе егде жастағылар) кез келген абдоминальді білінулерді емдеуші дәрігерге хабарлауы тиіс.

Асқазан-ішек қан кетулері немесе асқазан-ішек жолдарының ойық жарасы туындаған жағдайда емді шұғыл тоқтату керек.

Кетопрофенмен ем кезінде организмде сұйықтық іркілуі дамуы немесе күшеюі туралы хабарламалар болуына байланысты, артериялық гипертензия және/немесе іркілген жүрек жеткіліксіздігі бар емделушілерді мұқият қадағалау керек. 

Кетопрофенмен ем кезінде әсіресе жүрек-қан тамырлары ауруы бар емделушілерде артериялық қысым мониторингі ұсынылады. 

Бақыланбайтын артериялық гипертензиясы, жедел және ауыр созылмалы  жүрек жеткіліксіздігі, жүректің ишемиялық ауруы бар, шеткергі артерия және/немесе церебро-васкулярлы  аурулармен ауыратын емделушілерге кетопрофенмен ем абайлап жүргізілуі тиіс. Кейбір қабынуға қарсы стероидты емес препараттарды қабылдау артериялық тромбоздар (миокард инфаркті, инсульт) қатері дамуына байланысты болуы мүмкін. Кетопрофен үшін бұл қатерді жоққа шығаратын деректер жеткіліксіз.

Демікпесі, созылмалы ринит, созылмалы синусит және/немесе мұрын полипозы бар емделушілерде басқа емделушілерге қарағанда аллергиялық реакциялар жиі кездеседі.

Сондай-ақ гемостаздың бұзылуларымен,  гемофилиямен, Виллебранд – Юргенс ауруымен, ауыр  тромбоцитопениямен, бүйрек немесе бауыр жеткіліксіздігімен емделушілерде және  антикоагулянттар (кумарин және гепарин туындыларын, бәрінен бұрын молекулярлық салмағы төмен гепариндер) қабылдайтын емделушілерде де сақтық шараларын сақтау керек.

Емнің басында жүрек жеткіліксіздігі, цирроз және нефрозы бар емделушілерде, диуретиктер қабылдайтын емделушілерде, созылмалы бүйрек жеткіліксіздігі бар, әсіресе егде жастағы емделушілерде бүйрек қызметіне мұқият мониторинг жасалуы керек. Мұндай емделушілерде кетопрофенді қабылдау простагландиннің тежелуі нәтижесінде бүйрек қан ағыны төмендеуін туындатып, бүйректің декомпенсациясына алып келуі мүмкін.

Егер емдеу кезінде көру қабілетінің бұзылулары байқалса емді тоқтату керек.

Радикальді хирургиялық араласулар алдында  кетопрофенмен емді тоқтату керек.

Ауыру күшті болса кетопрофен морфин туындыларымен үйлестіре қолданылуы мүмкін.

Кетопрофен қабылдау әйелдің фертильділігін төмендетуі мүмкін, жүкті болғысы келетін әйелдерге қабылдау ұсынылмайды.

Берілген дәрілік препарат құрамында этанол 12.3 % (к/і) бар. Әрбір 2 мл дозасы құрамында 0,2 г этанол.  

Препаратты егде жастағыларға сақтықпен тағайындаған дұрыс. 

Қабынуға қарсы стероидты емес препараттармен, оның ішінде кетопрофенмен емнің ұзақ курсын алу  гематологиялық көрсеткіштерді, бауыр мен бүйрек қызметі көрсеткіштерін мониторингтеуді әсіресе егде жастағыларда талап етеді және емделушінің креатинин клиренсі 0.33 мл/с (20 мл/мин) төмен болса кетопрофен дозасын түзету керек.

Дәрілік заттың көлікті және потенциялды қауіпті механизмдерді басқару қабілетіне әсер ету ерекшелері 

Бас айналу, кеңістіктегі бағдарсыздық, ұйқышылдық, фокусталмаған көру немесе құрысулар туындаған жағдайда көлік жүргізуге және қауіптілігі зор механизмдерді басқаруға болмайды.

Артық дозалануы

Симптомдары: бас ауыруы, бас айналуы, ұйқышылдық, жүрек айнуы, құсу, диарея, іштің ауыруы. Уланудың ауыр жағдайында қан құсу, нәжістің қараюы, сананың ауытқуы, тыныстың тарылуы, гипотензия, құрысулар, бүйрек функциясының бұзылуы және бүйрек жеткіліксіздігі байқалуы мүмкін. 

Емдеу: симптоматикалық, арнайы у қайтарғысы жоқ. Кетопрофеннің асқазан-ішек жолына әсерін Н2-бөгегіштерінің, протон помполары мен простагландиндер көмегімен әлсіретуге болады. 

Шығарылу түрі  және қаптамасы

2 мл-ден мойнының үстіңгі жағында сындыруға арналған қызыл нүктесі бар янтарь түсті ампулаларға құяды.

5 ампуладан поливинилхлоридті үлбірден жасалған пішінді ұяшықты қаптамаға салады. 2 пішінді қаптамадан медицинада қолданылуы жөнінде мемлекеттік және орыс тілдеріндегі нұсқаулықпен бірге картон пәшкеге салынады.

Сақтау шарттары

25 ºС-ден аспайтын температурада сақтау керек. 

Балалардың қолы жетпейтін жерде сақтау керек!

Сақтау мерзімі

3 жыл

Препаратты  қаптамасында көрсетілген жарамдылық мерзімі өткеннен кейін  қолдануға болмайды.

Дәріханалардан босатылу шарты

Рецепт арқылы

Өндіруші/Қаптаушы

Лек Фармасьютикалс д.д, Словения

Address: Verovskova, 57, 1526 Ljubljana, Slovenia

Тіркеу куәлігінің иесі

Лек Фармасьютикалс д.д, Словения

Address: Verovskova, 57, 1526 Ljubljana, Slovenia

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның мекенжайы

Қазақстан Республикасындағы «Сандоз Фармасьютикалс д.д.» АҚ өкілдігі 

Алматы қ., Луганский к-сі 96, 

Телефон нөмірі - 258 10 48, факс: +7 727 258 10 47

e-mail: kzsdz.drugsafety@sandoz.com