Лефно

Қазақстан Республикасы

Денсаулық сақтау министрлігі 

Медициналық және

фармацевтикалық қызметті

бақылау комитеті Төрағасының

2010  жылғы  “18” қазан

№ 555   бұйрығымен

БЕКІТІЛГЕН

Дәрілік заттың медициналық 

қолданылуы жөніндегі нұсқаулық

ЛЕФНОТМ

Cаудалық атауы

ЛЕФНОТМ

Халықаралық патенттелмеген атауы

Лефлуномид

Дәрілік түрі

қабықпен қапталған  10 мг немесе 20 мг таблеткалар

Құрамы: 

Бір таблетканың құрамында

белсенді зат: 10 мг немесе 20 мг лефлуномид,

қосымша заттар: cтарлак, повидон К-30, натрий кроскармеллозасы, натрий лаурилсульфаты, коллоидты сусыз кремний қостотығы, тальк, қабықтың құрамы: ақ колликоат IR.

Сипаттамасы

Дөңгелек (10 мг) немесе сопақша (20 мг) екі жағы дөңес, ақ түсті, қабықпен қапталған таблеткалар.

Фармакотерапиялық тобы

Селективтік иммунодепрессанттар. 

АТС  L04A A13 коды

Фармакологиялық қасиеттері

Фармакокинетикасы

ЛефноТМ ішек қабырғасында және бауырда біріншілік метаболиздену жолымен А771 726 белсенді метаболитіне жылдам айналады, ал онымен ЛефноныңТМ бүкіл дерлік белсенділігі байланысты және ол қан плазмасындағы, несептегі, нәжістегі іздердің мөлшерімен анықталған бірден-бір айқындалатын метаболит болып табылады. 

Препараттың сіңуі 82 - 95%-ды құрайды және ас ішуге байланысты емес. 

А771726 метаболитінің Cmax мөлшері дозаны бір дүркін қабылдағаннан кейін 1-24 сағат аралығында айқындалады. А771726 плазмада альбуминмен жылдам байланысады. Байланыспаған А771726 фракциясы 0,62%-ды құрайды. Ревматизм артритімен ауыратындарда немесе созылмалы бүйрек жеткіліксіздігінде А771726 белсенді метаболитінің байланысуы түрленіп отырады және аздап төмендейді.

А771726 фармакокинетикалық параметрлерінің 5 мг-ден 25 мг-ге дейінгі дозаларда тікелей тәуелділіктері бар. Бұл зерттеулерде клиникалық әсер А771726 плазмалық қанығу деңгейімен және лефлуномидтің тәуліктік дозасымен тығыз байланысты. Тәуліктік 20 мг дозасында орташа А771726 Css мөлшері 35 мкг/мл-ні құрады. 

Лефлуномид 4-трифлуорометилаланинді қосқанда басты бір (А771726) метаболитіне және бірнеше екінші дәрежелі метаболиттерге дейін метаболизденеді. Лефлуномидтің А771726-дағы қайта биоөзгертілуі мен А771726-ның өзінің келесі кезектегі метаболизденуі бірнеше ферменттер арқылы бақыланады да, микросомальдық және басқа жасушалық фракцияларда жүзеге асады.

Лефлуномид іздерінің сандары плазмада, несепте және нәжісте айқындалады. Ағзадан А771726-ның шығарылуы баяу, клиренсі сағатына 31 мл-ні құрайды. T1/2 - 2 аптаға жуық. Тең көлемде несеп арқылы лефлуномид өндірген глюкуронидтер мен А771 726 өндірген оксанил қышқылы түрінде және нәжіс арқылы өзгеріссіз күйінде шығарылады.

Фармакодинамикасы

ЛефноТМ – изоксазолдық қатардағы иммуномодельдегіш препарат.  Антипролифераттық, иммуномодельдегіш (иммуносупрессиялық) және қабынуға қарсы әсер етеді. Лефлуномидтің белсенді А771726 метаболиті дегидрооротат-дегидрогеназа ферментін тежейді және ревматизм артриті, псориаздық артриті, сонымен қатар жасушалық жанама түрдегі ауру - аутоимундық Т болып табылатын псориаздың теріде көрініс беруі сияқты ревматизм ауруларының патогенезінде үдерісінде маңызды рөл ойнайтын белсенділендірілген лимфоциттерге антипролифераттық әсер етеді.

Лефно ревматизм артритінің белсенді түрінде аурудың белгілерін бәсеңдетеді және буындардың зақымдану үдерісін баяулатады.
 

Қолданылуы

- ересектердегі ревматизм артриті, белсенді сатысы 

- псориаздық артрит, белсенді сатысы 

Қолдану тәсілі мен дозалары

Емдеу 3 күн бойына тәулігіне 1 рет 100 мг-лік қанықтыратын дозадан басталады. Әріқарай ревматизм артритін емдегенде ұсынылатын қосалқы доза тәулігіне 1 реттік 20 мг-ні құрайды. Көтере алмаған жағдайда қосалқы дозаны тәулігіне 1 рет 10 мг-ге дейін кемітеді.

Белсенді сатыдағы псориаздық артритпен ауыратындарды емдеу үшін ұсынылатын қосалқы доза тәулігіне 1 рет 20 мг-ні құрайды.

Емдеу әсері ем басталғаннан кейінгі 4 аптадан соң байқала бастайды және 4 - 6 ай бойына күшейе түсуі мүмкін. Әдетте препаратты емдеуші дәрігердің қадағалауымен ұзақ уақыт қабылдаған дұрыс.

Егде жастағы емделушілердің дозасын реттеу талап етілмейді.

Таблеткаларды жеткілікті мөлшерде су іше отырып, шайнамай жұту керек. 

Жағымсыз әсерлері

- бас ауруы, бас айналуы, астения, парестезия 

- аздаған артериалдық гипертензия

- диарея, жүрек айнуы, құсу, анорексия, ауыз қуысының шырышты қабығының зақымдануы (афтоздық стоматит, еріндегі ойық жаралар), іш ауруы

- бауыр сынамалары көрсеткіштерінің - трансаминаздың, сілтілік фосфатазаның, билирубиннің ұлғаюы

- тендовагинит

- шаш түсуінің жеделдеуі, экзема, терінің құрғауы 

- лейкопения, аз мөлшердегі тромбоцитопения, эозинофилия, 

  панцитопения (препараттың антипролифераттық әсер етуінің нәтижесі болуы мүмкін), анемия

Сирек 

- агранулоцитоз, васкулит

- гепатит, холестаз, сары ауру түрінде бауыр қызметінің бұзылуы

Өте сирек

- перифериялық нейропатия

- өлім қаупіне соқтыруы мүмкін тінаралық пневмония

- бауырдың ауыр сипатты зақымдануы (бауыр жеткіліксіздігі, өлім қаупіне соқтыруы мүмкін жедел гепатонекроз)

- панкреатит

Жекелеген жағдайларда

- макулопапулездік бөрту, тері қышынуы, есекжем, 

  Стивенс-Джонсон синдромы, уытты эпидермалдық некролиз,  

  полиморфтық эритема 

- дәм сезу түйсіктерінің бұзылуы, мазасыздық 

- дене салмағының шамалы азаюы 

Қолдануға болмайтын жағдайлар

- лефлуномидке немесе препараттың басқа құрамдас бөліктеріне асқын сезімталдық

- иммунотапшылықтың ауыр ахуалдары, соның ішінде ЖҚТБ  

- бауыр қызметінің ауыр бұзылулары 

- сүйек кемігі қан түзілуінің айқын бұзылулары немесе басқа себептер салдарынан болатын (ревматизмдік артриттен басқа) анемия, лейкопения, тромбоцитопения 

- ауыр өтетін жұқпалар 

- орташа немесе ауыр бүйрек жеткіліксіздігі немесе ауыр бауыр жеткіліксіздігі, ауыр гипопротеинемия, соның ішінде нефротикалық синдром 

- жүктілік және лактация кезеңі

- емдеу кезеңінде немесе емдеуден кейін сенімді контрацепция қолданбайтын бала тууға қабілетті жастағы әйелдер, қан плазмасындағы белсенді А771 726 метаболитінің деңгейі 0,02 мг/л-ны құраған жағдайда 

- 18 жасқа дейінгі балалық және жасөспірімдік кезең 

ЛефноТМ-ны қабылдау кезеңінде тірі вакциналармен егілу ұсынылмайды. 

Дәрілермен өзара әрекеттесуі

Жағымсыз әсерлер айқындылығы препаратты таяуда қабылдаған, сондай-ақ ЛефноменТМ  бір мезгілде гепатоуытты немесе гематоуытты препараттарды қолданған, сонымен қатар бұл препараттарды ЛефноменТМ емделгеннен кейін препараттың ағзадан толық шығарылуы үшін қажетті кезеңді есепке алмай пайдаланған жағдайларда күшеюі мүмкін. Холестираминді немесе белсенділендірілген көмірді қолдану белсенді ЛефноТМ метаболитінің қанығу деңгейінің жылдам және көп мөлшерде азаюына алып келеді. ЛефноТМ мен метотрексаттың арасындағы өзара әрекеттесулерге зерттеу жүргізгенде бауыр ферменттері деңгейінің артқаны анықталды.

ЛефноныТМ  варфаринмен бірге пайдаланғанда протромбиндік уақыттың ұлғайғаны туралы хабарламалар бар. ЛефноныңТМ ревматизм ауруларын емдегенде қолданылатын малярияға қарсы препараттармен бір мезгілде қолданылуы, алтын препараттарымен, пеницилламинмен, азатиопринмен және басқа иммуносупрессиялық препараттармен қатар  қолданылуы жеткілікті зерттелмеген.

ЛефноныңТМ басқа препараттармен бірікпейтіні туралы мәліметтер жоқ.

Стероидтық емес қабынуға қарсы препараттармен және/немесе  ЛефноменТМ емделу басталғанға дейін төмен дозалардағы глюкокортикоидтермен емделген емделушілердің оларды әріқарай да қолдана берулеріне болады. 

Айрықша нұсқаулар

Препараттың белсенді құрамдас бөлігінің жартылай шығарылу кезеңінің созылуы нәтижесінде жағымсыз әсерлердің пайда болуы немесе олардың ЛефноныТМ қабылдауды тоқтатқаннан кейін де жалғасуы мүмкін.

Емді бастау алдында кең көлемдегі жалпы клиникалық қан талдауын жасау қажет, оның ішінде, әсіресе, таяуда немесе сол мерзімде  иммунодепрессантармен немесе гемотоуытты сипаттары бар препараттармен емдеу жүргізілген аурулардағы, бұрын қан көрінісінің бұзылу жағдайлары болған емделушілердегі тромбоциттер санының есептеулері ескерілуге тиісті.

Ауыр гематологиялық реакциялар (панцитопенияны қосқанда) көрініс бергенде ЛефноныТМ және сүйек кемігі қызметін күйрететін кез келген  препаратты қолдануды тоқтатып, лефлуномидтің ағзадан шығарылуын жеделдететін шаралар қабылдаған дұрыс.

Егер ЛефноныТМ қабылдаумен бір мезгілде қуатты миелоуытты препараттар (сондай-ақ олар емдеуге дейін және емдеуден кейін қолданылғанда) пайдаланылатын болса, қанның түзілуіне қатысатын мүшелер тарапынан жағымсыз әсерлердің өршу қаупі айтарлықтай артады.

ЛефноменТМ емделуді бастау алдында, сондай-ақ емделудің алғашқы 6 айы бойына әр ай сайын және әріқарайғы әр 8 апта сайын бауыр сынамаларынан (АлАТ деңгейін тексеру) өту керек. АлАТ белсенділігінің норманың жоғарғы шегінен 2 - 3 есеге табанды артқан жағдайында қандағы препараттың қанығу деңгейін тұрақты қадағалай отырып, тәуліктік дозаны 20 мг-ден 10 мг-ге дейін кеміту ұсынылады. Егер дозаны кеміткеннен кейін АлАТ белсенділігі деңгейінің табанды артуы (2-3 есе және одан да көбірек) сақталса, ЛефноныТМ қабылдауды тоқтатқан дұрыс. 

Емделушілер иммуносупрессиялық әсері бар дәрілік заттарды қолданғанда жұқпаларды, оппортунистік жұқпаларды қоса, жұқтыруға бейім болуы мүмкін. Жұқпалардың өту барысы ауыр болатындықтан, олар қарқынды емді талап етеді. Салмақты жұқпа жұқтырылғанда ЛефноменТМ емдеуді тоқтату және оны ағзадан шығару емшарасын тағайындау қажеттілігі туындауы ықтимал.

Артериалдық қан қысымын емдеуді бастамас бұрын өлшеген дұрыс. 

ЛефноменТМ емделіп жатқан ерлер препараттың болжамды фетоуыттық әсері және контрацепцияның талапқа сай құралдарын пайдалану қажеттілігі жөнінде ескертілуге тиісті. Болжамды жағымсыз ықпалды кеміту мақсатында еркектер сәбиді жоспарлы ұрықтандыру алдында препаратты қабылдауды тоқтатып, ЛефноныТМ ағзадан шығарудың арнаулы емшарасын қолдану керек.

Жүктілік және бала емізу кезеңінде қолданылуы 

 ЛефноменТМ емделуді бастау алдында жүкті болу ықтималдығын болғызбау қажет. Жүктілікке жол берілген жағдайда төменде баяндалатын ЛефноныТМ ағзадан шығару емшарасын тағайындау арқылы қандағы белсенді метаболит деңгейін тез кеміту есебінен ЛефноныТМ қабылдау салдарынан болатын  ұрыққа төнетін қатерді азайтуға болады. 

ЛефноныТМ қабылдауды тоқтатқаннан кейін холестираминді 8 г дозада тәулігіне 3 рет 14 күн бойына немесе белсенділендірілген көмірді 50 г-нан тәулігіне 4 рет 14 күн бойына қолданады. Препаратты ағзадан шығарудың таңдалған тәсіліне қарамастан ұрықтану сәті таяғанда, ең болмаса 14 күн аралығын өткізіп, екі рет қан плазмасындағы А771 726 қанығу деңгейін тексеру керек, одан кейін қанда А771 726 метаболитінің қанығу деңгейі 0,02 мг/л мөлшерінде бірінші көрініс беретін сәттен бастап, ұрықтану сәтіне дейін тағы да кем дегенде 45 күн күту қажет.

Ауруға белсенділендірілген көмір суспензиясын немесе холестираминді ішкізу арқылы енгізу А771 726 шығарылуын айтарлықтай жеделдетеді және арттырады. Мұндай әсер асқазан-ішектік диализденудің және/немесе ішек-бауырлық қайта айналымды тоқтатудың нәтижесінде пайда болады деп саналады.

Шығару емшарасынсыз А 771 726 метаболитінің қанығу деңгейі 20 мкг/л мөлшерінде 2 жыл өткенде ғана кемиді. 

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

ЛефноТМ препаратымен емдегенде психомоторлық реакциялар жылдамдығының және емделушінің бас айналуы сияқты жағымсыз әсер салдарынан зейінін шоғырландыру қабілетінің бұзылуы ықтимал. Мұндай жағдайларда емделуші автокөлікті басқарудан және қауіптілігі зор механизмдермен жұмыс істеуден бас тартқаны дұрыс. 

Артық дозалану

Белгілері: диарея, іштің ауруы, жүрек айнуы, құсу, бауыр қызметінің өзгеруі, анемия, лейкоцитемия 

Емдеу: препаратты ағзадан шығаруды жеделдету мақсатында холестираминді немесе белсенділендірілген көмірді қолдану.

Клиникалық көрсетілімдер анықталғанда ағзадан шығару емшарасын қайталауға болады. ЛефноТМ А771 726 бірінші метаболиті диализденбейді. 

Шығарылу түрі мен қаптамасы

Қабықпен қапталған 10 мг немесе 20 мг таблеткалар, пішінді ұяшықты немесе пішінді ұяшықсыз қаптамада 10 таблеткадан. 3 пішінді ұяшықты немесе пішінді ұяшықсыз қаптамалар медициналық қолданылуы жөніндегі нұсқаулықпен бірге картон қаптамада.

Сақтау шарттары

25°С-ден жоғары емес температурада құрғақ, жарық түспейтін жерде сақтау қажет. 

Балалардың қолы жетпейтін жерде сақтау керек!

Сақтау мерзімі

2 жыл

Қаптамада көрсетілген жарамдылық мерзімі өткеннен кейін пайдалануға болмайды!

Дәріханалардан босатылу шарттары 

Рецепт арқылы 

Өндіруші                

Кусум Хелткер Пвт. Лтд.,

СП 289 (А), Риико Индл. Ареа Чопанки, Бхивади (Радж.), Үндістан

Тұтынушылардан өнім (тауар) сапасы туралы түскен шағымдарды Қазақстан Республикасы аумағында қабылдайтын  ұйымның атауы  және  мекенжайы:  

Үндістандағы «Кусум Хелткер Пвт. Лтд.» серіктестігінің 

Қазақстан Республикасындағы өкілдігі

Алматы қаласы, М.Төлебаев көшесі, 38

тел./факс: 273-93-74; 273-68-10

электрондық  поштасы:

Office-kusumhealthcare@intelsoft.kz