Лориста

Дәрілік заттың медицинада

            қолданылуы жөніндегі нұсқаулық         

ЛОРИСТА®

Саудалық атауы 

Лориста®

Халықаралық патенттелмеген атауы

Лозартан

Дәрілік түрі

Үлбірлі қабықпен қапталған таблеткалар, 25 мг, 50 мг және 100 мг

Құрамы

Бір таблетканың құрамында

белсенді зат - 25 мг, 50 мг және 100 мг калий лозартаны, 

қосымша заттар: целлактоза, желатинденген крахмал, жүгері крахмалы, микрокристалды целлюлоза, сусыз коллоидты кремнийдің қостотығы, магний стеараты 

қабық құрамы: гипромеллоза, тальк, пропиленгликоль, титанның қостотығы  (Е171) (25 мг, 50 мг, 100 мг доза үшін),  хинолинді сары (Е104) (25мг доза үшін)

Сипаттамасы

Сопақша пішінді, екі жағы сәл дөңес, сары түсті үлбірлі қабықпен қапталған,  бір жақ бетінде  сызығы бар таблеткалар (25 мг доза үшін).

Дөңгелек пішінді, екі жағы сәл дөңес, ақ түсті үлбірлі қабықпен қапталған, бір жақ бетінде  сызығы және ойығы бар таблеткалар(50 мг доза үшін).

Сопақша пішінді, екі жағы сәл дөңес, ақ түсті үлбірлі қабықпен қапталған  таблеткалар (100 мг доза үшін).

Фармакотерапиялық тобы

Ренин-ангиотензин жүйесіне әсер ететін препараттар. Ангиотензин II антагонистері.   Лозартан.

АТХ коды   С09СА01

Фармакологиялық қасиеттері

Фармакокинетикасы

Сіңуі

Ішке қабылданғаннан кейін лозартан асқазан-ішек жолдарынан жақсы сіңіріледі, белсенді метаболит - карбоксил қышқылы және басқа да белсенді емес метаболиттердің түзілуімен бауыр арқылы бірінші өтуде елеулі метаболизмге ұшырайды. Лозартанның жүйелі биожетімділігі  шамамен 33% құрайды. Лозартан орташа шыңдық концентрацияларына 1 сағат ішінде, ал оның белсенді метаболиті 3-4 сағатта  жетеді. 

Таралуы 

Лозартан және оның белсенді метаболиті плазма ақуыздарымен, көбіне альбуминдермен 99% астам шамада байланысады. Лозартанның таралу көлемі 34 литрге тең. 

Биотрансформация 

Ішу арқылы қабылданған лозартанның шамамен 14% оның белсенді метаболитіне айналады.

Шығарылуы

Лозартанның және оның белсенді метаболитінің плазмалық клиренсі шамамен, тиісінше, минутына 600 мл  және минутына 50 мл құрайды. Лозартанның және оның белсенді метаболитінің бүйректік клиренсі шамамен, тиісінше, минутына 74 мл және минутына 26 мл құрайды. Лозартанды ішу арқылы қолданғанда дозаның 4%-ға жуығы несеппен өзгермеген күйде және 6%-ға жуығы белсенді метаболит түрінде несеппен шығарылады. Лозартанның және оның белсенді метаболитінің фармакокинетикасы калий лозартанының 200 мг дейінгі дозалануына ұқсас.

Ішу арқылы қабылданғаннан кейін лозартан мен оның белсенді метаболитінің қан плазмасындағы концентрациялары полиэкспоциональді төмендейді, тиісінше, ақырғы жартылай шығарылу кезеңі 2 сағатқа және 6-9 сағатқа жуықты құрайды. 100 мг дозаны тәулігіне бір рет қолданғанда лозартан да, оның белсенді метаболиті де қан плазмасында үлкен көлемде жиналмайды. 

Лозартан және оның метаболиті өтпен және несеппен шығарылады: 35%  және  43%  жуығы тиісінше несеппен шығарылады, және 58% және  50% жуығы тиісінше нәжіспен шығарылады. 

Емделушілердің жекелеген топтарындағы фармакокинетикасы

Артериялық гипертензиясы бар егде жастағы тұлғаларда лозартан және оның белсенді метаболитінің қан плазмасындағы концентрациялары артериялық гипертензиясы анықталған жас емделушілерден айтарлықтай ерекшеленбейді.

Артериялық гипертензиясы бар әйел емделушілерде қан плазмасындағы лозартан деңгейі артериялық гипертензиясы бар ер емделушілерге қарағанда екі есе жоғары, ал қан плазмасындағы белсенді метаболит деңгейінің еркектер мен әйелдерде айырмашылығы болмайды.

Ішу арқылы қолданғаннан кейін бауырының жеңіл және орташа дәрежедегі алкогольдік циррозы бар емделушілерде қан плазмасындағы  лозартанның және оның белсенді метаболитінің деңгейлері, емделуші жас ерлерге қарағанда, тиісінше, 5 және 1.7 есе жоғары болды.  

Креатинин клиренсі минутына 10 мл–ден жоғары емделушілерде лозартанның плазмалық концентрациясы өзгермеген. Бүйрек функциясы қалыпты емделушілермен салыстырғанда гемодиализдегі емделушілерде лозартанның AUC (қисық астындағы аудан «концентрация-уақыт») шамамен 2 есеге жоғары. 

Бүйрек жеткіліксіздігі бар немесе гемодиализдегі емделушілерде белсенді метаболитінің плазмалық концентрациясы өзгермеген.

Лозартан да, оның белсенді метаболиті де гемодиализ жүргізген кезде шығарылмайды.

Фармакодинамикасы

Лориста® - антигипертензиялық препарат, ангиотензин II (АТ1 типті) рецепторларының пероральді селективті антагонисі. Ангиотензин II  ренин-ангиотензинді жүйенің белсенді гормоны және  артериялық гипертензия патофизиологиясының маңызды факторларының бірі болып табылады. Ангиотензин II әртүрлі тіндерде болатын (мысалы, тамырлардың тегіс бұлшықеті тіндерінде, бүйрек үсті безінде, бүйректе және жүректе) АТ1рецепторлармен байланысады және қан тамырлары тарылуы мен альдостерон босап шығуын қоса бірқатар маңызды биологиялық әсерлерді туындатады.

Сондай-ақ ангиотензин II тегісбұлшықет жасушалары пролиферациясын стимуляциялайды. 

Лозартан және оның  фармакологиялық белсенді  метаболиті  Е3174  шығу көзіне және биосинтез жолдарына байланыссыз II ангиотензиннің физиологиялық әсерлерінің бәрін бөгейді.

Лориста® АТ1 рецепторларын іріктеп бөгейді және басқа гормондардың рецепторларын немесе жүрек-қан тамырлары жүйесінің қызметін реттеуге жауап беретін иондық каналдарды бөгемейді. Оған қоса лозартан брадикининді  ыдыратуға қатысатын ферменттің, ангиотензин өзгертуші фермент (киназа II)  белсенділігін бәсеңдетпейді. 

Жеңіл және орташа дәрежелі артериялық гипертензиясы бар емделушілерде лозартанды бір рет қабылдау систолалық және диастолалық артериялық қысымның статистикалық тұрғыдан елеулі төмендегенін көрсетеді. Оның ең жоғары әсері қабылдағаннан кейін  6 сағаттан соң өрбиді, емдік әсері 24 сағат бойы сақталады, сондықтан оны тәулігіне бір рет қабылдау жеткілікті. Антигипертензиялық әсері емнің бірінші аптасы ішінде дамиды, содан кейін біртіндеп өседі және 3-6 аптадан кейін тұрақтанады. 

Лориста®  препараты артериялық гипертензиясы бар еркектер және әйелдерде, сондай-ақ жас (≤ 65 жас) және егде емделушілердің ((≥ 65 жас) барлығы үшін бірдей тиімді.

Артериялық гипертензиясы бар емделушілердің лозартан қабылдауды тоқтатуы артериялық қысымның күрт ұлғаюына алып келмейді. Артериялық қысымның айқын төмендеуіне қарамастан лозартанның жүрек жиырылуы жиілігіне ешбір клиникалық елеулі әсері жоқ.

Қолданылуы

- ересектердегі эссенциальді артериялық гипертензияны емдеуде 

- артериялық гипертензиясы және протеинуриясы ≥ 0,5 г /тәулік 2 типті қант диабеті бар ересек емделушілердегі бүйрек ауруын антигипертензиялық емнің бөлігі ретінде емдеуде 

- ангиотензин өзгертуші фермент тежегіштерін көтере алмау себебінен қолдану мүмкін емес деп есептелгенде, әсіресе жөтел дамығанда немесе оларды тағайындауға қарсы көрсетілім болғанда ересек емделушілердің созылмалы жүрек жеткіліксіздігін емдеуде (сол жақ қарынша лықсыту фракциясы ≤40%, клиникалық тұрақты жай-күй) 

- ЭКГ расталған, артериялық гипертензиясы және сол жақ қарынша гипертрофиясы бар ересек емделушілердегі инсульттің даму  қаупін төмендетуде

Қолдану тәсілі және дозалары

Ересектерге

Ішке, ас қабылдаумен байланыссыз ішке қабылдауға арналған. Таблетканы шайнамай, стақан сумен  іше отырып, жұтады.  Қабылдау жиілігі - тәулігіне 1 рет.

Артериялық гипертензия

Көптеген емделушілер үшін бастапқы және демеуші доза күніне бір рет 50 мг құрайды. Ең жоғарғы антигипертензиялық әсерге емдеу басталған соң үштен алты аптаға дейінгі уақыт ішінде қол жеткізіледі. 

Кейбір емделушілерге дозаны күніне бір рет 100 мг-ға дейін (таңертең) жоғарылату талап етілуі мүмкін. 

Протеинуриясымен бірге ≥ 0,5 г /күн II типті қант диабеті бар емделушілердегі артериялық гипертензия

Әдеттегі бастапқы дозасы күніне бір рет 50 мг құрайды. Емдеуді бастағаннан кейін бір айдан соң артериялық қысым нәтижелері негізінде дозалау күніне бір рет 100 мг дейін арттырылуы мүмкін.  Лозартанды басқа да  антигипертензиялық дәрілермен  (мысалы, диуретиктер, кальций өзекшелері блокаторлары, альфа- немесе бета- блокаторлары және әсері орталықтық препараттар), сондай-ақ  инсулинмен және басқа да  кеңінен пайдаланылатын гипогликемиялық дәрілермен (мысалы,  сульфонилмочевина, глитазон,  глюкозидаза тежегіштері) қатар қабылдауға болады.

Жүрек жеткіліксіздігі

Жүрек жеткіліксіздігі бар емделушілердегі Лориста® препаратының бастапқы дозасы тәулігіне бір рет қабылданатын 12.5 мг құрайды. Емделушілер жақсы көтеретін тәулігіне  50 мг демеуші дозаға  қол жеткізу үшін препарат дозасын біртіндеп 12.5 мг-ға апталық аралықпен  (яғни күніне 12.5 мг, күніне 25 мг, күніне 50 мг, күніне 100 мг, күніне бір реттік ең жоғары доза 150 мг дейін) жоғарылату керек.

Жай-күйі АӨФ тежегіштерін қолданғанда тұрақтанған жүрек жеткіліксіздігі бар емделушілерді лозартанмен емдеуге ауыстырудың қажеті жоқ. 

ЭКГ расталған, артериялық гипертензиясы және сол жақ қарынша гипертрофиясы бар ересек емделушілердегі инсульттің даму қаупін төмендетуде. 

Әдеттегі бастапқы дозасы күніне бір рет 50 мг лозартанды құрайды. Гидрохлоротиазидтің төмен дозасы қосылуы мүмкін және/немесе артериялық қысым нәтижелері негізінде дозаны күніне бір рет 100 мг дейін арттыру керек.

Жағымсыз  әсерлері

Жиі (≥ 1/100 - <1/10 дейін):

-  бас айналуы, вертиго

-  астения, қажығыштық

-  гипотензия, ортостатикалық гипотензияны қоса

-   анемия

-   бүйрек жеткіліксіздігі, бүйрек қызметінің бұзылуы 

Жиі емес (≥ 1/1, 000 -  <1/100 дейін):

-  бас ауыруы, ұйқышылдық, ұйқының бұзылуы

-  жүрек қағуының жиілеуі, стенокардия

-  симптоматикалық гипотензия (әсіресе тамырішілік көлемінің азаюымен емделушілерде, мысалы, ауыр жүрек жеткіліксіздігі бар емделушілер немесе диуретиктердің жоғары дозаларымен емдегенде), дозаға байланысты ортостатикалық әсерлер, бөртпе 

- іштің ауыруы, іштің қатуы, диарея, жүрек айнуы, құсу

- ентігу, жөтел, мұрын бітелуі, фарингит, қойнаулар ауыруы, жоғарғы тыныс  

  жолдары жұқпасы

- диспноэ

- есекжем, қышыну, бөртпе

-  гиперкалиемия

-  АЛТ деңгейінің жоғарылауы (әдетте препаратты тоқтатқаннан кейін болмайтын), қандағы мочевина, қан плазмасындағы креатинин және калий  деңгейінің артуы

- гипогликемия

Сирек (≥ 1/10 000 - <1/1000 дейін):

- парестезия

- естен тану, жыпылықтағыш аритмия, инсульт

Белгісіз (жиілігін қолда бар деректер негізінде бағалау мүмкін емес):

-  анемия

-  естен тану, жүрек қағысының жиілеуі 

-  ортостатикалық гипотензия

-  диарея

-  белдің ауыруы 

-  несеп шығару жолдарының жұқпасы 

-  тұмауға ұқсас симптомдар 

Пост-маркетингтік кезеңде тіркелген жағымсыз реакциялар

Жиілігін бағалау мүмкін емес:

-  анемия, тромбоцитопения

-  құлақтағы шуыл 

-  бас сақинасы 

-  жөтел

-  диарея, панкреатит

-  мазасыздық

-  бауыр функциясы бұзылуы

-  есекжем, қышыну, бөртпе, жарыққа сезімталдық  

-  миалгия, артралгия, рабдомиолиз

-  эректильді дисфункция / импотенция

-  депрессия

-  гипонатриемия

-  бүйрек жеткіліксіздігін қоса, бүйрек функциясының өзгерістері; бүйрек функциясының бұл өзгерістері емдеуді тоқтатқаннан кейін қайтымды болуы мүмкін 

Сирек (≥ 1/10 000 - <1/1, 000 дейін):

-  анафилактикалық реакциялар, Квинке ісінуі, тыныс алу жолдарының өткізгіштігі бұзылуын туындататын көмей және дауыс саңылауының ісінуін қоса және/немесе бет, ерін, жұтқыншақ және/немесе тілдің ісінуі; бұл емделушілердің кейбіреулерінде Квинке ісінуі АӨФ тежегіштерін қоса, басқа дәрілерді қабылдауға байланысты тіркелген; васкулит, Шенлейн-Генох пурпурасын қоса

-  гепатит

Қолдануға болмайтын жағдайлар

- препараттың белсенді заттарына немесе компоненттерінің кез келгеніне жоғары сезімталдық 

- бауыр қызметінің ауыр жеткіліксіздігі

- қант диабеті бар емделушілерде алискиренмен бірге қолдану 

- жүктілік және лактация кезеңі

- 18 жасқа дейінгі балалар мен  жасөспірімдерге

Дәрілермен өзара әрекеттесуі

Басқа да антигипертензиялық препараттар лозартанның гипотензиялық әсерін күшейтуі мүмкін. Жағымсыз реакциялар сияқты (үшциклды антидепрессанттар, антипсихоздық дәрілер, баклофен, амифостин сияқты), артериялық гипотензияның туындауын индукциялауы мүмкін басқа да препараттарды бір мезгілде қолдану гипотензияның туындау қаупін күшейтуі мүмкін.

Лозартан  көп жағдайда  P450 (CYP) 2C9 цитохромымен белсенді карбокси-қышқылды метаболитіне метаболизденеді. Флуконазолдың (CYP2C9 тежегіші) белсенді метаболитке әсерді шамамен 50%-ға азайтатыны анықталған. Сондай-ақ лозартанмен және рифампицинмен (ферменттер метаболизмінің индукторы) бір мезгілде емдеу белсенді метаболиттің плазмалық концентрациясын 40%-ға қысқартады.Бұл әсердің клиникалық мәні белгісіз. Флувастинмен қоса емдеудегі  (CYP2C9 әлсіз тежегіші) әсерінде ешбір айырмашылық анықталмаған.

Ангиотензин ІІ немесе оның әсерлерін бөгейтін басқа дәрілік заттарды қолданған кездегідей, құрамында калийі бар басқа препараттарды (мысалы,  калий жинақтаушы диуретиктер:амилорид, триамтерен, спиронолактон) бір мезгілде пайдалану калий деңгейін (мысалы, гепарин), калий қоспаларын немесе құрамында калийі бар тұз алмастырғыштарды арттыруы мүмкін,  қан плазмасындағы калий деңгейінің жоғарылауына әкелуі мүмкін. Бірге емдеуге болмайды.

Қан плазмасындағы литий концентрациясының және уыттылығының қайтымды артуы литийді АӨФ тежегіштерімен  және өте сирек жағдайларда - ангиотензин II рецепторы антагонистерімен қатарлас қабылдау уақытында анықталған. Литийді және лозартанды қоса қабылдаған жағдайда сақ болу керек. Егер осылай біріктіру керек болса, қатарлас қолдану уақытында  қан плазмасындағы литий деңгейін бақылау ұсынылады.

Ангиотензин ІІ антагонистерін қабынуға қарсы стероидты емес дәрілермен

(яғни, іріктелген  ЦОГ-2 тежегіштерімен, қабынуға қарсы әсер ететін дозалардағы ацетилсалицил қышқылы және іріктелмеген қабынуға қарсы стероидты емес дәрілермен) бір мезгілде қолданғанда антигипертензиялық әсері азаюы мүмкін. Ангиотензин ІІ антагонистерін немесе диуретиктерді және  қабынуға қарсы стероидты емес дәрілерді бірге қолдану, жедел бүйрек жеткіліксіздігінің болжамды дамуын қоса, бүйрек  функциясының бұзылу  қаупінің артуына, сондай-ақ, әсіресе, бүйрек функциясының әлсіздігі бар емделушілерде қан плазмасындағы калий деңгейінің жоғарылауына  алып келуі мүмкін. Мұндай біріктірілімді, әсіресе, егде жастағы емделушілерге абайлап қолдану керек. Емделушілер сұйықтықтың жеткілікті мөлшерін қабылдауы тиіс, және біріктірілген ем басталғаннан кейін бүйрек функциясын мұқият бақылау керек, сондай-ақ артынан ауық-ауық бақылау керек.

Қосарлы блокаданы (мысалы, АӨФ тежегішін ангиотензин II рецепторларының антагонистімен тағайындау) бүйрек функциясына мұқият мониторинг жүргізіп,  әрбір жағдайды жеке қарастыра  отырып, шектеу керек. Кейбір зерттеулер диагностикаланған атеросклероздық ауруы, жүрек жеткіліксіздігі немесе нысана-ағзалардың зақымдануы мен диабеті бар емделушілерде, ренин-ангиотензин-альдостерон жүйесінің қосарлы блокадасы, ренин-ангиотензин-альдостерон жүйесіне әсер ететін бір препаратты қолданумен салыстырғанда, артериялық гипотензия, естен тану, гиперкалиемия мен бүйрек функциясының бұзылуы (жедел бүйрек жеткіліксіздігін қосқанда) туындау жиілігінің жоғарылауымен астасатынын көрсетті.     

Айрықша нұсқаулар

Жоғары сезімталдық  

Сыртартқысында ангиоэдемасы (беттің, еріннің, тамақтың және/немесе тілдің ісінуі) бар емделушілер  дәрігердің мұқият қадағалауында болуы тиіс.

Артериялық гипотензия және электролиттік/сұйықтық дисбаланс

Симптоматикалық гипотензия, әсіресе бірінші дозадан кейін, күшті диуретиктер қолданудан, тұз қолдануды емдәмдік шектеуден, диарея немесе құсудан  туындаған сұйық көлемі азайған және/немесе натрий тапшылығына ұшыраған емделушілерде туындауы мүмкін. Бұндай жай-күйлер лозартанмен ем бастар алдында түзетуді талап етеді немесе бастапқыда төмендеу дозалар қолданылуы керек.

Электролиттік теңгерімсіздік

Бүйрек функциясы бұзылуы бар (қант диабетімен және онсыз) емделушілерде электролиттік теңгерімсіздік жиі байқалатынын ескеру керек. Нефропатиямен 2 типті қант диабеті бар емделушілерде плацебо қабылдаушы топпен салыстырғанда лозартан қабылдаған емделушілер тобында гиперкалиемия туындау жиілігі жоғары болды. Сондықтан қан плазмасындағы калий концентрациясын және креатинин клиренсі көрсеткіштерін ұдайы бақылау қажет, әсіресе, мұндай бақылау жүрек жеткіліксіздігі бар және креатинин клиренсі минутына 30-50 мл емделушілерде жиі орындалу керек. Калий жинақтаушы диуретиктерді, калий қоспаларын және құрамында калий бар тұз алмастырғыштарды лозартанмен бір мезгілде қолдану ұсынылмайды.

Бауыр жеткіліксіздігі 

Бауыр циррозы бар емделушілердің қан плазмасында лозартанның концентрацияларының едәуір жоғарылауын айғақтайтын фармакокинетикалық деректер негізінде сыртартқысында бауыр жеткіліксіздігі бар емделушілерде төмендеу дозалар қолдану қарастырылу керек. Бауыр функциясының ауыр жеткіліксіздігі бар емделушілерде лозартанды қолданудың емдік тәжірибесі жоқ. Сондықтан бауыр функциясының ауыр жеткіліксіздігі бар емделушілерде лозартан  қолдануға болмайды.  

Бүйрек жеткіліксіздігі 

Ренин-ангиотензин-альдостеронды жүйенің тежелуі нәтижесінде, бүйрек  жеткіліксіздігін қоса, бүйрек функциясының өзгерістері  байқалған (әсіресе, жүрек қызметінің ауыр жеткіліксіздігі бар немесе бүйрек функциясының бұзылулары бұрыннан бар емделушілер сияқты бүйрек қызметі ренин-ангиотензин-альдостерон жүйесіне тәуелді емделушілерде).  Ренин-ангиотензин-альдостерон жүйесіне әсер ететін басқа дәрілік заттарды қолданған кездегідей, бүйрек артерияларының екі жақты стенозы және жалғыз бүйрек артериясының стенозы бар емделушілер қанында мочевинаның және қан плазмасындағы креатинин деңгейлерінің жоғарылауы бақыланған, бүйрек функциясының мұндай өзгерістері емдеуді тоқтатқаннан кейін қайтымды болуы мүмкін. Лозартанды бүйрек артерияларының екі жақты стенозы және жалғыз бүйрек артериясының стенозы бар емделушілерде сақтықпен қолдану керек.   

Бүйрек трансплантациясы

Препаратты бүйрек трансплантациясы жүргізілген емделушілерде қолдану тәжірибесі жоқ. 

Алғашқы гиперальдостеронизм

Алғашқы гиперальдостеронизмі бар емделушілерде, әдетте, ренин-ангиотензин жүйесін бәсеңдету жолымен әсер ететін гипертензияға қарсы препараттарды қолдануда әсері байқалмаған. Сондықтан емделушілердің бұл тобында лозартанды қолдану ұсынылмаған.

Жүректің ишемиялық аурулары және цереброваскулярлық аурулар: Гипертензияға қарсы басқа препараттарды қолданған кездегідей, ишемиялық жүрек аурулары және цереброваскулярлық аурулары бар емделушілерде  артериялық қысымның шектен тыс түсіп кетуі миокард инфарктісінің немесе инсульттің дамуына алып келуі мүмкін.

Жүрек жеткіліксіздігі

Ренин-ангиотензин-альдостерон жүйесіне әсер ететін басқа препараттарды қолданған кездегідей, бүйрек функциясының бұзылуымен бірге және онсыз жүрек жеткіліксіздігі бар емделушілерде ауыр сипатты артериялық гипотензияның және (көбіне жедел) бүйрек қызметі жеткіліксіздігі даму қаупі бар.

Лозартанды жүрек жеткіліксіздігі және қатарлас ауыр бүйрек жеткіліксіздігі бар емделушілерде, ауыр жүрек жеткіліксіздігі (IV класты NYHA) бар, сондай-ақ аритмияның өмірге қауіпті симптомдары бар емделушілерде емдік қолданудың жеткілікті тәжірибесі жоқ. Сондықтан лозартанды емделушілердің бұл тобында сақтықпен қолдану керек. Лозартанның бета-блокаторлармен біріктірілімін сақтықпен қолдану керек.

Аортальді және митральді клапандар стенозы, обструктивті гипертрофиялық кардиомиопатия

Басқа вазодилататорларды қолданған кездегідей, аортальді және митральді клапандар стенозы немесе обструктивті гипертрофиялық кардиомиопатиясы бар емделушілерге ерекше сақтықпен тағайындайды.

Басқа да ескертулер және сақтық шаралары 

 АӨФ тежегіштеріне қатысты анықталғандай, лозартанның және басқа  

 ангиотензин антагонистерінің негроидты  нәсіл емделушілерінде басқа  

 емделушілердегіден гөрі, артериялық қысымды   төмендетуде тиімділігі аз,   

 бұл осы нәсілдің өкілі болып саналатын артериялық гипертензиясы бар 

 емделушілерде рениннің белсенділігі төмендігінен  болуы мүмкін. 

 Қосымша заттар туралы ақпарат

 Лориста®құрамына лактоза кіреді. Сирек тұқым қуалайтын  галактозаны  

 көтере алмаушылықтың түрлері, Лапп лактаза тапшылығы мен глюкоза-

 галактоза  сіңуі бұзылуы бар емделушілерге бұл препаратты қабылдауға  

 болмайды.

 Дәрілік заттың көлік құралын немесе қауіптілігі зор механизмдерді басқару   

қабілетіне әсер ету ерекшеліктері

Көлік құралдарын басқару немесе әртүрлі механизмдерді пайдалануда  антигипертензиялық дәрілерді қолданғанда кейде, әсіресе емдеудің басында немесе дозасын ұлғайтқанда бас айналуы немесе ұйқышылдық туындауы мүмкіндігін ескеру керек.     

Артық дозалануы

Симптомдары: артериялық гипотензия және тахикардия; парасимпатикалық (вагустық) стимуляция әсерінен брадикардия   дамуы мүмкін.

Емі: шаралар жүргізу препаратты қабылдау уақытына, симптомдардың түрі мен күрделілігіне байланысты. Қан айналымы жүйесін тұрақтандыруға бірінші дәрежеде мән беру керек. Белсендірілген көмір тағайындау. Өмірлік маңызы бар функцияларды бақылау.  

Гемодиализ тиімсіз, өйткені Лозартан да, оның белсенді метаболиті де гемодиализ көмегімен шығарылмайды. 

Шығарылу түрі  және қаптамасы  

Поливинилхлоридті/поливинилдихлоридті үлбірден және алюминий фольгадан жасалған пішінді ұяшықты қаптамаға 14 таблеткадан салынған. 

1 немесе 2 пішінді ұяшықты қаптамадан  медицинада қолданылуы жөніндегі мемлекеттік және орыс тілдеріндегі нұсқаулықпен бірге картон пәшкеге салынған.  

Сақтау шарттары

30 ºС -ден аспайтын температурада сақтау керек. 

Балалардың қолы жетпейтін жерде сақтау керек!

Сақтау мерзімі

5 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы

Өндіруші 

КРКА, д.д. Ново место, Словения

Шмарьешка 6, 8501 Ново место, Словения

Тіркеу куәлігінің иесі

КРКА, д.д. Ново место, Словения

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын ұйымның  мекенжайы  

«КРКА Қазақстан» ЖШС, ҚР, 050059, Алматы қ., Әл-Фараби даңғылы 19, 1б корпусы, 2-ші қабат, 207 кеңсе

тел.:   +7 (727) 311 08 09

факс: +7 (727) 311 08 12

info.kz@krka.biz