Қазақстан Республикасы

Денсаулық сақтау министрлігі

 Фармация комитеті Төрағасының

2007 жылғы “14” желтоқсан

№ 211 бұйрығымен

БЕКІТІЛГЕН

Дәрілік затты қолдану жөнінде

тұтынушыларға арналған

нұсқаулық

(аннотация-қосымша бет)

                                                       Амлотоп

Дәрілік препаратты қолданудың алдында міндетті түрде  дәрігермен кеңесу және нұсқаулықты зейін қойып оқып шығу керек!

Саудалық атауы

Амлотоп

Халықаралық патенттелмеген атауы

Амлодипин

Дәрілік түрі

5 мг және 10 мг таблеткалар

Құрамы

Бір таблетканың құрамында

белсенді зат – 5 мг және 10 мг амлодипинге шаққандағы 6,93 мг және 13,86 мг амлодипин безилаты,

қосымша заттар: лактоза, микрокристалды целлюлоза, кальций стеараты,  натрий кроскармеллозасы, аэросил.

Сипаттамасы

Ақ немесе ақ түсті дерлік, жалпақ цилиндр пішінді, кертігі және бөлетін сызығы бар таблеткалар

Фармакологиялық қасиеттері

Фармакокинетикасы

Ішіп қабылдағаннан кейін амлодипин асқазан-ішек жолынан баяу сіңеді. Орташа толық биожетімділігі - 64%, қан сарысуында ең жоғары қанығу деңгейі 6-9 сағаттан кейін байқалады. Тұрақты тепе-теңдіктің қанығу деңгейіне 7 күн емделгеннен кейін жетеді. Ас амлодипиннің сіңуіне ықпалын тигізбейді.  Орташа таралу көлемі – дене салмағына әр келісіне шаққанда 21 л, бұл препараттың көп бөлігінің тіндерде, ал біршама азы қанда болатындығын көрсетеді. Қанда болатын препараттың көп бөлігі (95%) қан плазмасы ақуыздарымен байланысады.

Амлодипин баяу, бірақ экстенсивті метаболизмге (90%) ұшырап, бауырда белсенді емес метаболиттер түзіледі, бауыр арқылы «алғаш өту» әсері бар. Метаболиттердің елеулі фармакологиялық белсенділігі жоқ.

Бір рет ішіп қабылдағаннан кейін жартылай шығарылу кезеңі (Т1/2) 31-ден 48 сағатқа дейін өзгереді, қайталап тағайындаған кезде Т1/2 шамамен 45 сағатты құрайды. Қабылданған дозаның 60%-ға жуығы несеппен бірге көбінесе метаболиттер түрінде, 10%-ы өзгермеген күйінде, ал 20-25%-ы нәжіспен, сондай-ақ емшек сүтімен бірге шығарылады.  Амлодипиннің жалпы клиренсі – 0,116 мл/с/кг (7 мл/мин/кг, 0,42 л/сағ/кг).

Егде жастағы емделушілерде (65 жастан асқан) амлодипиннің шығарылуы жас емделушілерге қарағанда баяу (Т1/2 – 65 сағ), алайда  бұл айырмашылықтың клиникалық маңызы жоқ. Бауыр қызметінің жеткіліксіздігіне шалдыққан емделушілерде Т1/2 ұзарған деп жорамалданады. Ұзақ уақыт тағайындаған кезде организмде тәуліктік жиналуы жоғары болады (Т1/2 – 60 сағатқа дейін). Бүйрек қызметінің жеткіліксіздігі амлодипиннің клиникасына елеулі ықпал етпейді. Препарат гематоэнцефалиялық бөгет арқылы өтеді. Гемодиализде жойылмайды.

Фармакодинамикасы

Дигидропиридин туындысы – «баяу» кальций өзекшелерінің ІІ буындағы бөгегіші, антиангинальды және гипотензиялық әсер етеді. Дигидропиридин рецепторларымен байланыса отырып,  кальций өзекшелерін бөгейді, кальцийдің жасушаға мембрана арқылы тасымалдануын төмендетеді (кардиомиоциттерге қарағанда, қан тамырлардың тегіс бұлшық етті жасушаларын үлкен дәрежеде).

Антиангинальды әсері коронарлық және шеткергі артериялардың және артериолдардың кеңеюімен жүзеге асады: стенокардияда миокард ишемиясының білінуін азайтады; шеткергі артериолдарды кеңейте отырып, жалпы шеткергі қан тамырлар кернеуін төмендетеді, жүрекке түсетін жүктемені азайтады, миокардтың оттегіні қажет етуін төмендетеді.  Негізгі коронарлы артерияларды және артериолдарды кеңейте отырып, оттегінің миокардқа түсуін арттырады (әсіресе вазоспастикалық стенокардияда); коронарлы артериялардың констрикциясының дамуын болдырмайды (оның ішінде шылым шегуден болатын). Стенокардияға шалдыққан науқастарда бір реттік тәуліктік дозасы физикалық жүктемені орындау уақытын арттырады, стенокардияның және SТ сегментінің «ишемиялық» депрессиясының дамуын баяулатады, стенокардия ұстамасының жиілігін және нитроглицеринді тұтынуды төмендетеді.

Дозаға байланысты гипотензиялық әсер етеді. Гипотензиялық әсер қан тамырлардың тегіс бұлшық еттеріне тікелей кеңейткіш ықпал етуі арқылы жүзеге асырылады. Артериялық гипертензияда бір реттік дозасы 24 сағат бойы артериялық қысымның (АҚ) клиникалық тұрғыдан маңызды төмендеуін қамтамасыз етеді (науқастың «жатқан» және «тұрған» кезінде). АҚ-ды бірден төмендетпейді, физикалық жүктемеге төзімділікті, сол жақ қарыншадан қанның шығу фракциясын төмендетпейді. Сол жақ қарынша миокардының гипертрофиясы дәрежесін азайтады,  жүректің ишемиялық ауруында (ЖИА) антисклеротикалық және кардиопротекторлы әсер етеді. Миокардтың жиырылуына және өткізгіштігіне ықпалын тигізбейді, жүректің жиырылу жиілігінің (ЖЖЖ) рефлекторлы артуын тудырмайды, тромбоциттердің бірігуін тежейді, шумақтық сүзілу жылдамдығын арттырады, әлсіз натрийуретикалық әсері бар. Диабеттік нефропатияда микроальбуминурияның айқындылығын арттырмайды. Зат алмасуға және қан плазмасының липидтеріне жағымсыз ықпалын тигізбейді. Әсерінің басталу уақыты – 2-4 сағат, әсерінің ұзақтығы – 24 сағат.

Қолданылуы

-          артериялық гипертензияда (монотерапия немесе гипертензияға қарсы басқа дәрілермен біріктіріп)

-          тұрақты стенокардия кернегенде, вазоспастикалық стенокардияда (Принцметал стенокардиясы).

Қолдану тәсілдері және дозасы

Ішке, артериялық гипертензияны және стенокардияны емдеу үшін бастапқы доза  5 мг препаратты тәулігіне 1 рет. Ең жоғары доза тәулігіне бір реттік 10 мг-ға дейін арттырылуы мүмкін. Артериялық гипертензия кезінде демеуші доза тәулігіне 2,5-5 мг болуы мүмкін.

Стенокардия кернеуінде және вазоспастикалық стенокардияда – тәулігіне 5-10 мг, бір рет. Стенокардия ұстамасының алдын алу үшін – тәулігіне 10 мг.

Дене салмағы азғантай    емделушілерге, бойы биік емес емделушілерге, егде жастағы науқастарға, бауыр қызметі бұзылған науқастарға гипотензиялық дәрі ретінде амлодипинді бастапқыда 2,5 мг дозада, антиангинальды дәрі ретінде - 5 мг дозада тағайындайды.

Тиазидті диуретиктермен, бета-адренобөгегіштермен және ангиотензинге өзгертуші ферменттермен (АӨФ) бір мезгілде тағайындаған кезде дозаны өзгерту қажет етілмейді. Бүйрек қызметінің жеткіліксіздігіне шалдыққан емделушілерде дозаны  өзгерту қажет емес.

Емдеу ұзақтығын емдеуші дәрігер анықтайды.

Жағымсыз әсерлері

-          жүректің лүпілдеуі, ентігу, артериялық қысымның айқын төмендеуі, талу, васкулит, ісінулер (сирақтың және табанның ісінуі), бетке қанның «тебуі».

Сирек:

-          жүрек ырғағының бұзылуы (брадикардия, қарыншалық тахикардия,  жүректің дірілдеуі), кеуде клеткасының ауыруы, ортостатикалық гипотензия

-          бас ауыру, бас айналу, қажығыштық, ұйқышылдық, көңіл-күйдің өзгеруі, құрысулар

-          сананың жоғалуы, гипестезия, нервоздық

-          парестезиялар, діріл, вертиго, астения, дімкәстік, ұйқысыздық, депрессия, әдеттегіден тыс түс көрулер

-          жүректің айнуы, құсу, іш тұсының ауыруы

-          «бауыр» трансаминазасы деңгейінің жоғарылауы және сарғаю (холестаздан болған), панкреатит, ауыз ішінің құрғауы, іштің желденуі, қызыл иектің гиперплазиясы, іш қату немесе іш өту

-          поллакиурия, несеп шығаруға күшенудің ауыртуы, никтурия, жыныстық қызметтің бұзылуы (оның ішінде потенцияның төмендеуі)

-          артралгия, артроз, миалгия (ұзақ уақыт қолданған кезде)

-          гинекомастия, полиурикемия, дене салмағының артуы/төмендеуі, тромбоцитопения, лейкопения, гипергликемия, көрудің нашарлауы, көзге заттың қосарланып көрінуі, конъюнктивит, көздің ауыруы, құлақтың шуылдауы, арқаның ауыруы, диспноэ, мұрынның қанауы, терлеудің күшеюі, шөлдеу

Өте сирек:

-          жүрек қызметі жеткіліксіздігінің дамуы немесе ушығуы, экстрасистолия, бас сақинасы

-          атьаксия, апатия, ажитация, амнезия

-          гастрит, тәбеттің артуы

-          дизурия, полиурия

-          ксеродермия, алопеция, дерматит, пурпура, тері түсінің өзгеруі, терінің қышуы, бөртпе (оның ішінде эритематозды, макулопапулезді бөртпе, есекжем), ангионевротикалық ісіну

-          миастения

-          салқын жабысқақ тер, жөтел, ринит, паросмия, дәм сезудің бұзылуы, аккомодацияның бұзылуы, ксерофтальмия

Қолдануға болмайтын жағдайлар

-          амлодипинге және дигидропиридиннің басқа туындыларына сезімталдық жоғары болғанда

-          тұрақсыз стенокардияда, стенокардияның ауыр ұстамаларында

-          айқын артериялық гипотензияда

-          коллапста, кардиогенді шокта

-          жүктілікте және лактация кезеңінде

-          18 жасқа дейін (тиімділігі және қауіпсіздігі анықталған жоқ).

Сақтықпен: бауыр қызметінің бұзылуы, синустық түйіннің әлсіздігі синдромы (айқын брадикардия, тахикардия), жүрек қызметінің теңгерілмеген созылмалы жеткіліксіздігі,  жеңіл немесе орташа артериялық гипотензия, қолқа стенозы, митральды стеноз, гипертрофиялық обструкциялық кардиомиопатия, жедел миокард инфаркті (одан кейін 1 ай бойы), қант диабеті, липидті профильдің бұзылуы, егде жас.

Дәрілермен өзара әрекеттесуі

Микросомальды тотығудың тежегіштері  қан плазмасында Амлотоптың қанығу деңгейін арттырып, жағымсыз әсерлердің даму қаупін күшейтеді, ал бауырдың микросомальды ферменттерінің демегіштері азайтады.

Гипотензиялық әсерді қабынуға қарсы стероидты емес препараттар, әсіресе индометацин (натрийдің кідіруі және простагландиндердің синтезінің бүйректермен бөгелуі), альфа-адреноынталандырғыштар, эстрогендер (натрийдің кідіруі), симпатомиметиктер әлсіретеді.

Тиазидті және «ілмекті» диуретиктер, бета-адренобөгегіштер, верапамил, АӨФ тежегіштері және нитраттар антиангинальды және гипотензиялық әсерлерді күшейтеді.

Амиодарон, хинидин, альфа1-адренобөгегіштер, антипсихотикалық дәрілік заттар (нейролептиктер) және «баяу» кальций өзекшелері гипотензиялық әсерді күшейтуі мүмкін.

Дигоксиннің және варфариннің фармакокинетикалық параметрлеріне ықпалын тигізбейді.

Циметидин Амлотоптың фармакокинетикасына ықпал етпейді.

Литий препараттарымен бірге қолданған кезде олардың нейроуыттылығының біліністері (жүректің айнуы, құсу, іш өту, атаксия, діріл, құлақтың шуылдауы) күшеюі мүмкін.

Кальций препараттары кальций өзекшелерінің «баяу» бөгегіштерін азайтуы мүмкін.

Прокаинамид, хинидин және QТ аралығын ұзартатын басқа дәрілік заттар теріс инотропты әсерді күшейтеді және QТ аралығын едәуір ұзарту қаупін арттыруы мүмкін.

Грейпфрут шырыны қан плазмасында Амлотоптың қанығу деңгейін төмендетуі мүмкін, алайда бұл төмендету өте аз, ол амлодипиннің әсерін елеулі түрде өзгертпейді.

Айрықша нұсқаулар

Емдеу кезеңінде дене салмағын және натрийді тұтынуын бақылау, тиісті диета тағайындау қажет.

Тісті таза ұстау және тіс дәрігеріне жиі қаралу қажет (ауыруды, қанауын және қызылиектің гиперплазиясын болдырмау үшін).

Егде емделуші адамдарға дозалау тәртібі басқа жастағы емделушілердегідей. Дозаны арттырған кезде егде емделушілерді мұқият бақылау қажет.

Кальций өзекшелерінің «баяу» бөгегіштерінде «тоқтату» синдромының жоқтығына қарамай, емдеуді тоқтатар алдында дозаларды біртіндеп азайту керек.

Амлотоп К+, глюкозаның, триглицеридтердің, жалпы холестериннің, несеп қышқылының, креатининнің және несеп қышқылы азотының  плазмалық қанығу деңгейіне ықпал етпейді.

Дәрілік заттың көлік құралдарын немесе қауіпті механизмдерді басқару қабілетіне әсер ету ерекшеліктері

Амлотоптың автомобильді басқаруға немесе механизмдермен жұмыс істеуге ықпалы туралы ақпараттар болған жоқ. Осыған қарамастан, кейбір емделушілерде көбінесе емнің басында ұйқышылдық және бас айналу пайда болуы мүмкін. Олар пайда болған кезде емделуші автомобиль басқарғанда және механизмдермен жұмыс істегенде сақтық шараларын орындауға тиіс.

Артық дозалануы

Белгілері: артериялық қысымның айқын төмендеуі, тахикардия, шамадан тыс шеткергі дилатация

Емдеу: асқазанды шаю, белсенділендірілген көмір тағайындау, жүрек-қан тамыр жүйесі қызметін демеу, жүрек пен өкпе қызметтерінің көрсеткіштерін,  аяқ-қолдардың көтерілуін,  айналымдағы қан көлемін және диурезді бақылау керек. Қан тамырларының тонусын қалпына келтіру үшін – қан тамырларын тарылтатын препараттарды қолдану ( оларды қолдануға қарсы көрсетілім жоқ болса);  кальций өзекшелері бөгеттерінің зардаптарын жою үшін – кальций глюконатын көктамыр ішіне енгізу керек. Гемодиализ тиімді емес.

Шығарылу түрі және қаптамасы

5 мг және 10 мг таблеткалар.  ПВХ үлбірінен және алюминий фольгадан жасалған пішінді ұяшықты қаптамада 10 немесе 30 таблеткадан.  Пішінді ұяшықты 3 қаптамадағы 10 таблетка  немесе пішінді ұяшықты  1 қаптамадағы 30 таблетка қолданылуы жөніндегі нұсқаулықпен бірге картон пәшкеде.

Сақтау шарттары

Б тізімі. Құрғақ, жарық түспейтін жерде, +25ºС-ден аспайтын температурада сақтау керек.

Балалардың қолы жетпейтін жерде сақтау керек!

Жарамдылық мерзімі

3 жыл

Қаптамасында көрсетілген жарамдылық мерзімі өткеннен кейін қолданбау керек.

Дәріханадан босату шарттары

Рецепт бойынша

Өндіруші

«МАКИЗ-ФАРМА» ЖАҚ

109029, Москва қаласы,

Автомобиль тар жолы, 6 үй

Тел.: (495) 974-70-00

Факс: (495) 974-11-10

e-mail: mail@makiz-pharma.ru