Бонджигар

№ исх: 132   от: 31.05.2018

Қазақстан Республикасы 

Денсаулық сақтау министрлігі 

Фармация комитеті төрағасының 201_ жылғы  “____” ___________

№ _____ бұйрығымен

БЕКІТІЛГЕН

Дәрілік затты медициналық

қолдану жөніндегі нұсқаулық

БОНДЖИГАР

Саудалық атауы

Бонджигар

Халықаралық патенттелмеген атауы

Жоқ

Дәрілік түрі

Капсулалар

Құрамы

Бір капсуланың құрамында

белсенді заттар:

Ақ вербезин шөбінің қою экстрактісі                                     130.0 мг

Пикрориза курроа тамырсабақтары мен 

тамырларының  қою экстрактісі                                             43.0 мг

Қара алқа жемістерінің қою экстрактісі                                 25.0 мг

Кәдімгі шашыратқы тұқымдарының қою экстрактісі           93.5 мг

Тамарикс жыңғылы жемістерінің қою экстрактісі                48.0 мг

Егістік шомыр тұқымдарының қою экстрактісі                     32.0 мг

Қылқанды бөріқарақат жемістерінің қою экстрактісі           76.0 мг

Жайылған берхавий шөптерінің қою экстрактісі                   52.5 мг

Капсула қабығының құрамы: натрий лаурилсульфаты, метилпарабен (Е218), пропилпарабен (Е216), желатин, тазартылған су, титанның қостотығы (Е171), FD&C Хинолинді сары №10 (Е104), FD&C Аллура қызыл № 40 (Е129), FD&C Бриллиантты көк №1 (Е133).

Сипаттамасы

Корпусы мен қақпағы қоңыр түсті, қатты желатинді капсулалар, өлшемі №0. 

Корпусы мен қақпағында “BONJIGAR” жазуы бар.

Капсулалардың ішіндегісі өзіне тән хош иісі мен ащылау дәмі бар қоңыр түсті ұнтақ.

Фармакотерапиялық тобы

Ас қорыту жолы және зат алмасу. Бауыр және өт шығару жолдарының ауруларын емдеуге арналған препараттар. Өт шығару жолдарының ауруларын емдеуге арналған препараттар және біріктірілген липотропты препараттар.

АТХ коды А05 C 

Фармакологиялық қасиеттері

Фармакокинетикасы

Сіңуі асқазан-ішек жолында жүреді. Бонджигар препаратының әсері оның компоненттерінің жиынтық әсері болып табылады, сондықтан кинетикалық бақылаулар жүргізу мүмкін емес;  компоненттер маркерлердің немесе биозерттеулердің көмегімен қадағаланбайды. Осы себептен препараттың метаболиттерін анықтау да мүмкін емес.

Фармакодинамикасы

Бонджигар – кешенді өсімдік тектес препарат, фармакологиялық әсері оның құрамына кіретін гепатопротекторлық, қабынуға қарсы, уыттануға қарсы және өт айдайтын әсер беретін белсенді компоненттер кешеніне негізделген. 

Ақ вербезин құрамында гепатоуыттылыққа қарсы қасиеттері бар видилолактон  мен диметил видилолактон,  аскорбин қышқылы, алкалоид эклиптин, сондай-ақ тиофен туындылары бар. 

Пикрориза курроа құрамында гликозидтер – пикрозид, куткозид, андросин, апоцинин бар. Антигистаминдік, қабынуға қарсы (тромбоциттер белсенділенуін тежеу арқылы), өт айдайтын және антиоксиданттық әсер береді, бұдан бөлек иммунитетті реттейтін әсері бар.  

Қара алқа құрамында гликоалкалоидтар – соласодин, соламарин, соласонин бар. Тыныштандыратын, ауыруды басатын, іш жүргізетін әсері бар.

Кәдімгі шашыратқы  құрамында таниндер, полифенолдар, майлар бар. Өт  айдайдын, гепатапротекторлық әсер береді.

Тамарикс жыңғылы құрамында тамарексин, аглюкон бар. Басқа гепатоқорғағыш  препараттар  әсерін белсенділендіреді,  қан тоқтататын  қасиеттері бар.

Егістік шомыр  құрамында гликозидтер, эфир майлары, аскорбин қышқылы, лизоцим, аминқышқылдары бар (орнитин, цитрулин, аргинин). Антиоксидант ретінде әсер етеді, гепатотроптық және өт айдайтын әсер береді, бауырдың   детоксикациялық қабілетін күшейтеді, метаболизмнің реттелуіне ықпал етеді.

Қылқанды бөріқарақат құрамында алкалоидтар берберин, бербамин, аромолин, карахин, пальматин, оксиакантин, органикалық қышқылдар мен қанттар, кофе және ферулий  қышқылдары бар. Өт айдайды, микробқа қарсы, диареяға қарсы әсері бар. 

Жайылған берхавия  құрамында алкалоидтар триаконтанол, гентриаконтан, флавоноидтар, гликозидтер бар. Гепатопротекторлық, ауыруды басатын, несеп айдайтын әсер береді.

Бонджигардың қабынуға қарсы әсері простагландиндер биосинтезіне қажетті 2-А арахидон қышқылы фосфолипидінің өндірілуін болдырмауға негізделген.  Гепатопротекторлық әсері есебінен лизосомалар жарғақшасы тұрақтанады, ұлғайған бауырдың өлшемі азайып, АЛТ, АСТ және билирубин көрсеткіштері жылдам нормаға келеді. Бонджигардың уытсыздану қызметі трикарбон қышқылдары циклін күшейтуге негізделген, бұл ақуыздар алмасуының аммиакқа дейін ыдырау өнімдерін жылдам шығаруына және бастапқы несеп түзілуіне әкеледі. Бонджигардың липотропты әсері липотропты агенттер: холин, метионин мен лецитиннің өндірілуі есебінен бауыр жасушаларында май жиналуын болдырмауға негізделген. Олар майларды май қышқылдарына дейін ыдыратады, олардың сіңуіне кедергі келтіреді және бауыр жасушаларынан бұрын түзілген май қосылыстарының жойылу үдерісін тездетеді. Өт айдайтын әсері өт өндірілуінің күшеюіне және тұтқырлықтың төмендеуіне негізделген. Бонджигар лейкоциттердің иммунологиялық және бактерияларға қарсы қызметін, олардың қозғалғыштығын ұлғайта және фагоцитозды көтермелей отырып, реттейді. Бұдан басқа, препарат дербес интерферон өндірілуіне ықпал етеді. Антиоксидантты әсері бар (жасуша ішінде қуат өндірілуін көтермелейді және бос радикалдардың әсерінен бауырды оларды байланыстыру және организмнен шығару арқылы қорғайды).

Қолданылуы

 Кешенді ем құрамында:

-         өт шығару  жолдардың дискинезиясында

-         созылмалы  калькулездік емес холециститте

-         шығу тегі әр түрлі жедел және созылмалы гепатиттерде, химиялық заттар, дәрілік препараттардың, алкогольдің жағымсыз әсерлерінен  туындаған уытты гепатитте

-         майлы гепатозда  (соның ішінде қант диабеті кезіндегі)

-         бауыр циррозында

Қолдану тәсілі және дозалары

Ересектер – күніне 2 рет 1-2 капсуладан.

Препаратты тамақтан кейін қабылдайды.

Аурудың жедел түрлерін емдеу кезінде препаратты қабылдау ұзақтығы – 2 апта. 

Аурудың созылмалы түрлерін емдеген кезде – 4-6 апта.

Жағымсыз әсерлері

-         препараттың компоненттеріне аллергиялық реакциялар  

-         нәжістің жиілеуі

Қолдануға болмайтын жағдайлар

-         препараттың  компоненттеріне жекелей жоғары сезімталдық

-         18 жасқа дейінгі балалар мен жасөспірімдер

-         жүктілік және лактация кезеңі 

Дәрілермен өзара әрекеттесуі

Анықталмаған

Айрықша нұсқаулар

Препараттың жүктілік және лактация кезеңінде қолданылуы жөнінде клиникалық мәліметтер жоқ.

Дәрілік препараттың көлік құралдарын және қауіптілігі зор  механизмдер мен машиналарды басқару қабілетіне әсер ету ерекшеліктері

Әсер етпейді

Артық дозалануы

Анықталмаған

Шығарылу түрі және қаптамасы

20 және 60 капсуладан бұрандалы пластмасса қақпағы бар пластмассадан жасалған құтыларда. Құтыларға капсулалармен бірге ылғал жұтқышы бар қалташа салынады, бос кеңістік гигроскопиялы медициналық мақтамен толтырылады. Құтының мойнын алюминий фольгамен желімдейді. 

1 құтыдан медициналық қолдану жөніндегі мемлекеттік және орыс тілдеріндегі нұсқаулықпен бірге картон қорапшаға салынады.

Сақтау шарттары

25оС-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші

«Хербион Пәкістан Пвт Лтд»,

Коранги өнеркәсіп аймағы, 30/28

Карачи қ., Пәкістан.

Тіркеу куәлігінің  иесі

«Хербион Пәкістан Пвт Лтд», Пәкістан.

Қазақстан Республикасы аумағында тұтынушылардан дәрілік заттың  сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)  

«Фармация Юниверсал» ЖШС

Алматы қ., Чаплин/Халиуллин к-сі 71/66

Тел: 234-48-53, 234-44-88

Факс: 234-41-77 

Е-mail: info.kz@herbion.com